ახალქალაქის მუნიციპალიტეტის სოფელ ვაჩიანში დედისა და სამი შვილის გარდაცვალება, წინასწარი ინფორმაციით, განზრახ ჩადენილი მკვლელობაა. 

37 წლის ქალბატონსა და მცირეწლოვან გოგონებს სასიკვდილო ჭრილობები ბლაგვი საგნით აქვთ მიყენებული,  ხოლო უმცროსი 5 წლის ვაჟი გაგუდულია.

შემთხვევა დაახლოებით ორი დღის წინ მოხდა. ცხედრები კი მეზობლებმა 10 ივლისს აღმოაჩინეს. სახლში მხოლოდ დედა და სამი არასრულწლოვანი შვილი ცხოვრობდა. ოჯახის უფროსი სამუშაოდ რუსეთის რესპუბლიკაში იმყოფება.

გარდაცვლილებს უკვე ჩაუტარდათ სამედიცინო ექსპერტიზა. დღეს დილით სოფელში ნათესავების სახლში გადაასვენეს.

როგორც ადგილობრივ ხელისუფლებაში ადასტურებენ, საქმე განზრახ მკვლელობის მუხლით გადაკვალიფიცირდა. თავდაპირველი ვერსია, რომელიც გარდაცვალების მიზეზად ბუნებრივი აირის გაჟონვას ადასტურებდა, გამოირიცხა. სამართალდამცველები ერთ ეჭვმიტანილს ამ დრომდე ეძებენ.