აჭარაში ჩასულ ტურისტს ზღვა და მთა ერთნაირ მასპინძლობას გაუწევს. ბოლო ტრენდი აჩვენებს, რომ ტურისტებისათვის აჭარაში საზღვაო ტურიზმის პარალელურად, სოფლად ტურიზმიც მოთხოვნადი ხდება.

ზღვისა და მთის უნიკალური შერწყმა კი, ტურისტის დასვენებას უფრო სრულყოფილს ხდის, მით უმეტეს, თუ ამ ყველაფერს აჭარული სამზარეულოც დაემატება.

„აჭარა საქართველოში ის ერთ-ერთი რეგიონია, სადაც ზღვისა და მთის უნიკალური კომბინაცია არის ტურისტებისათვის განმსაზღვრელი ფაქტორი. ერთ-ერთი ადგილი, რომელიც ძალიან დიდ როლს თამაშობს ამ კომბინაციაში არის მუნიციპალიტეტი ქედა, უფრო კონკრეტულად სოფელი ვაიო, სადაც მრავლადაა ღვინის სახლები, სადაც შეგვიძლია დავაგემოვნოთ ადგილობრივი სამზარეულო, რაც თავის მხრივ დამატებით ემიციებს წარმოქმნის. ტურისტებს, რომლებიც ისვენებენ ზღვაზე სულ რაღაც ერთ საათში შეუძლიათ ეწვიონ მაღალმთიან აჭარას და გაიზირონ ყველა ის ემოცია, რაც აჭარის მთებშია“, - განაცხადა აჭარის „მთავარმა მასპინძელმა“, აჭარის ტურიზმის დეპარტამენტის ხელმძღვანელმა მამუკა ბერძენიშვილმა, რომელიც სოფელ ვაიოში პროექტ „გაიცანი საქართველოს“ ფარგლებში ქართველ ჟურნალისტებს მასპინძლობდა.

როგორც ბერძენიშვილი განმარტავს, მაღალმთიან აჭარაში ვითარდება შესაბამისი ინფრასტრუქტურაც, რათა ტურისტმა მეტი კომფორტი მიიღოს და სათანადოდ დაისვენოს. ბერძენიშვილი აღნიშნავს, რომ დაახლოებით 2 წლის განმავლობაში კერძო სექტორთან თანამშრომლობით რამდენიმე გესტჰაუსი გაიხსნა რეგიონის ამ ნაწილში. განვითარდა ღვინის სახლებიც და ტურისტებს, რომლებიც ზღვაზე ისვენებენ, უკვე შეუძლიათ მრავალფეროვან მაღალმთიან აჭარასაც გაეცნონ.

 რაც შეეხება ფასებს, ვაიოში აჭარული სამზარეულოს დაგემოვნება 25 ლარიდან (ერთ კაცზე) იწყება და 45 ლარამდეა, ღამისთევით ფასი შესაძლოა 80 ლარამდეც გაიზარდოს.