აჭარის მთავრობის თავმჯდომარემ ზურაბ პატარაძემ აჭარის ფინანსთა და ეკონომიკის მინისტრი რამაზ ბოლქვაძე მინისტრის რანგში სამინისტროს თანამშრომლებს წარუდგინა. შეხვედრაზე მთავრობის თავმჯდომარემ რამაზ ბოლქვაძის საქმიანობაზე კიდევ ერთხელ ისაუბრა და განაცხადა, რომ რამაზ ბოლქვაძე ძალიან მნიშვნელოვანი პროგრამის ავტორია.

„საუბარია მის მიერ აჭარის სახაზინო სამსახურის უფროსად მუშაობის დროს 2004-2005 წლებში დანერგილ ინოვაციურ პროგრამაზე,რომელმაც სახაზინო სამსახურის მუშაობა სრულყოფილი, უფრო მარტივი და მოქნილი გახადა. სახაზინო სამსახურის ახალი პროგრამით გამარტივდა მანამდე არსებული ბიუროკრატიული პროცესების გამო დროში გაწელილი ფინანსური ტრანზაქციების შესრულება. ინოვაციური პროგრამა ბიუჯეტის აღსრულების პროცესზეც დადებითად აისახა. კერძოდ, დაიწყო ბიუჯეტით გათვალისწინებული პროგრამების უფრო ეფექტური განხორციელება.
რამაზ ბოლქვაძეს კიდევ ერთი უმნიშვნელოვანესი ინოვაცია უკავშირდება. აჭარის ფინანსთა და ეკონომიკის მინისტრის მოადგილის რანგში მისი ძალიან აქტიური მუშაობის შედეგად 2014 წელს აჭარის ავტონომიური რესპუბლიკის რესპუბლიკური ბიუჯეტის დაგეგმვა პროგრამული ბიუჯეტის ფორომატით განხორციელდა,რაც შეიძლება ითქვას მთელს საქართველოშიც კი იმ დროისათვის უპრეცედენტო მოვლენა იყო. ვუსურვებ წარმატებებს ბატონ რამაზს,ჩვენ ერთად ბევრ სასიკეთო საქმეს გავაკეთებთ ქვეყნისთვის და რეგიონისთვის“, აღნიშნა აჭარის მთავრობის მეთაურმა ზურაბ პატარიძემ.