„სოკარ ჯორჯია გაზი“ ქობულეთისა და ხელვაჩაურის 13 სოფლის გაზიფიცირებას ახორციელებს
აჭარის მთავრობის თავმჯდომარის მოსახლეობასთან შეხვედრებისას ერთ-ერთ მნიშვნელოვან თემად გამოიკვეთა გაზიფიცირების მიმართულება. რეგიონში გაზიფიცირების შესახებ სრული ინფრომაციის მისაღებად და არსებული მდგომარეობის შესასწავლად ზურაბ პატარაძე დღეს „სოკარ ჯორჯია გაზი აჭარას“ დირექტორს დავით ლეკიშვილს და კომპანია „სოკარის“ საქართველოს წარმომადგენლობის რეგიონალურ მენეჯერს საფარ ალიზადას შეხვდა.
მთავრობის ადმინისტრაციაში გამართულ შეხვედრაზე განხილული იქნა რეგიონში მიმდინარე პროექტები. ამ ეტაპზე კომპანია „სოკარ ჯორჯია გაზი“ ქობულეთისა და ხელვაჩაურის 13 სოფლის გაზიფიცირებას ახორციელებს. გაზის გაყვანის სამუშაოები 2016 წლის გეგმით ქობულეთის მუნიციპალიტეტის რამდენიმე სოფელში, კერძოდ, ქვედა სამების, ბობოყვათის, ქვედა დაგვის, ხუცუბანი-ნაკაიძეების, დაგვის მოსახლეობისთვის მოხდება.
2016 წლის გეგმის მიხედვით მოხდება ასევე ხელვაჩაურის მუნიციპალიტეტის სოფლების - კაპრეშუმის, ზედა ახალშენის, ახალშენის, ხეღრუს, განახლების, სამების, ქვედა სამების დაქსელვა. აღნიშნული პროექტის ფარგლებში, ქობულეთისა და ხელაჩაურის მუნიციპალიტეტებში გაზიფიცირების სამუშაოები 320 კილომეტრიანი მონაკვეთზე ხორციელდება და 4855 აბონენტს მოიცავს.
„სოკარ ჯორჯია გაზის“ ინფორმაციით, აღნიშნულ სამუშაოებზე დასაქმებულია 350 ადგილობრივი კადრი. ზურაბ პატარაძემ მადლობა გადაუხადა სოკარის წარმომადგენლებს გაწეული საქმიანობისათვის.
„ვხედავთ, რომ ბოლო წლებში უდიდესი შრომაა გაწეული რეგიონის გაზიფიცირების კუთხით, 63 ათასი აბონენტი ნამდვილად დიდი წინსვლაა. მიხარია, რომ ეს მონაცემები კიდევ უფრო იზრდება და ამ მიმართულებით მიდის მუშაობა“ - აღნიშნა ზურაბ პატარაძემ.
