დღეს ბათუმის მერმა და აჭარის მთავრობის თავმჯდომარემ ე.წ. ჭაობის ქუჩების სარეაბილიტაციო სამუშაოები დაათვალიერეს. პარალელურად, გიორგი ერმაკოვი და ზურაბ პატარაძე დემეტრე თავდადებულის ქუჩაზე მცხოვრებ მოსახლეობასა და პუშკინის ქუჩაზე, სავაჭრო ობიექტებში დასაქმებულებს შეხვდნენ, მათი პრობლემები მოისმინეს და დახმარება აღუთქვეს.
,,მიმდინარე სარეაბილიტაციო სამუშაოები გულისხმობს გიორგი ბრწყინვალესა და ჭავჭავაძის ქუჩებს შორის მონაკვეთების, პუშკინისა და მისი გადამკვეთი ქუჩებისა და მთლიანად წერეთლის ქუჩის (მანთაშევის გადასასვლელამდე) რეაბილიტაციას. სექტემბრის ბოლომდე ქუჩების ფილებით მოპირკეთება დასრულდება ბერიძის, 26 მაისისა და ლუკა ასათიანის ქუჩებზე. ეს ის ქუჩებია, სადაც საკანალიზაციო სისტემის რეაბილიტაციის პროექტი განვახორციელეთ და შესაძლებელია კეთილმოწყობითი სამუშაოების ჩატარება. პროექტის ღირებულება 20 მილიონი ლარია. ჭაობის სრული რეაბილიტაცია 2018 წელს დასრულდება, რომელიც მოიცავს საკანალიზაციო და სანიაღვრე სისტემის რეაბილიტაციასა და ქუჩების კეთილმოწყობას“ - განაცხადა გიორგი ერმაკოვმა ინფრასტრუქტურული სამუშაოების დათვალიერებისას.
ქალაქის მერმა და რეგიონის მთავრობის თავმჯდომარემ თავდაპირველად დემეტრე თავდადებულისა და პუშკინის ქუჩების კვეთაში უკვე დასრულებული სამუშაოები დაათვალიერეს და ე.წ. ჭაობის ქუჩების სარეაბილიტაციო სამუშაოების გეგმა-გრაფიკს გაეცნენ. გეგმის მიხედვით, პუშკინის ქუჩის ჯავახიშვილიდან დემეტრე თავდადებულის ქუჩამდე მონაკვეთის, მათ შორის, გადამკვეთი ქუჩების კეთილმოწყობა მიმდინარე თვის ბოლოს დასრულდება. დღესვე, გიორგი ერმაკოვმა და ზურაბ პატარაძემ ვაჟა-ფშაველასა და 26 მაისის ქუჩებზე მიმდიანრე სამუშაოები დაათვალიერეს, სადაც უკვე დაიგო ასფალტის საფარი, მოეწყო ბორდიურები და მიმდინარეობს დეკორატიული ფილების დაგება ტროტუარებზე. რაც შეეხება პუშკინისა და გიორგი ბრწყინვალეს ქუჩებს შორის არსებულ მონაკვეთებს, ამ ეტაპზე მიწისქვეშა სამუშაოები ხორციელდება, რის შემდეგაც დაიგება ასფალტის საფარი, მოეწყობა ბორდიურები, პანდუსები და ტროტუარებზე დაიგება დეკორატიული ფილები.
აღნიშნული მონაკვეთების კეთილმოწყობის შემდეგ სამუშაოები 9 მარტისა და ბერიძის ქუჩებზე გაგრძელდება, სადაც უკვე მოწესრიგებულია წყლის, წყალარინებისა და სანიაღვრე სისტემები.
კეთილმოწყობის სამუშაოები, მონაკვეთების მიხედვით, ეტაპობრივად ხორციელდება. საერთო ჯამში მოეწყობა 10 კმ-მდე ქუჩა, დაიგება დაახლოებით 120000 კვ.მ. ასფალტის საფარი.
ჭაობის ქუჩების კეთილმოწყობისთვის ქალაქის ბიუჯეტში 19 მილიონამდე ლარია გათვალისწინებული, რომლის ფარგლებშიც სამუშაოები 3 წლის განმავლობაში, ეტაპობრივად 25 ქუჩაზე უნდა ჩატარდეს. სამუშაოებს ტენდერში გამარჯვებული კომპანია „ზიმო-7“ ახორციელებს.