ახლა გვჭირდება ერთსულოვნება, რომ ოკუპანტ ქვეყანასთან ყოველგვარი კოლაბორაციონიზმი გამოირიცხოს, - აცხადებს  „სამოქალაქო პლატფორმა-ახალი საქართველოს“ ერთ-ერთი ლიდერი სერგო ჩიხლაძე.  მისი თქმით, საქართველოს თითოეულმა მოქალაქემ არ უნდა მისცეს საშუალება არავის, მით უფრო, ხელისუფლებას, პირდაპირ თუ ირიბად მოხდეს პრორუსული რიტორიკის  წახალისება.

„8 წელი გავიდა 2008 წლის აგვისტოს ომიდან. ვიხსენებთ და პატივს მივაგებთ გმირებს, რომელთა სიცოცხლის ფასადაც მტერმა ვერ შეძლო ჩვენი ქვეყნის სრული ოკუპირება. ოკუპაცია დღესაც გრძელდება და ამაზე ვდუმვართ. ჩვენ არ გვაქვს ამის უფლება. ჩვენ არ გვაქვს უფლება ჩვენი გმირი ჯარისკაცების საფლავებს გადავუაროთ და შევეგუოთ პრორუსული რიტორიკის  წახალისება. ეს ღალატია. ღალატია ქვეყნის, ღალატია ჩვენი შვილების და იმ ბიჭების, რომელთა ხსოვნასაც დღეს პატიცს მივაგებთ. საქართველოს მთავრობა არც ერთ მომენტს არ უნდა კარგავდეს და ყველა საერთაშორისო არენაზე მსოფლიოს ყოველდღე უნდა ახსენებდეს რუსეთის სამხედრო აგრესიის შესახებ. დარწმუნებული ვარ ოქტომბერში ხალხი აირჩევს ხელისუფლებას, რომელიც მნიშვნელოვნად გააძლიერებს საქართველოს როლს საერთაშორისო არენაზე და გაატარებს მკვეთრ და აქტიურ საგარეო პოლიტიკას ჩვენი ქვეყნის დეოკუპაციის მიმართულებით“, - განაცხადა სეგო ჩიხლაძემ.