დაკარგული კურსანტების ძებნაში თურქული გემი ჩაერთო. ოპერაცია გონიოში დილიდან სპეციალური ტექნიკის დახმარებით მიმდინარეობს. თურქული ხომალდი სამაშვებლო ოპერაციაში სამი დღის განმავლობაში მიიღებს მონაწილეობას, ამის შესახებ განცხადება თავდაცვის მინისტრმა, ლევან იზორიამ, გააკეთა, რომელიც ხომალდის ბორტზე იმყოფებოდა და სამძებრო ოპერაციას პირადად აკვირდება.

ხომალდი გონიოს სანაპიროზე 07:00 საათზე შევიდა. Minehunter-ზე იმყოფება თავდაცვის მინისტრი ლევან იზორია. მინისტრი ხომალდზე თურქეთის გენერალურ კონსულთან იასინ თემისკანთან და აჭარის მთავრობის თავმჯდომარესთან ზურაბ პატარაძესთან ერთად ავიდა.

იმ შემთხვევაში, თუკი სამი დღის განმავლობაში ვერ მოხერხდა დაკარგულების პოვნა, მინისტრის თქმით, თურქეთი მზად არის, სამუშაოებში შემდეგ დღეებში მიიღოს მონაწილეობა.

ხომალდზე 41 მაშველია და ის სპეციალური ტექნიკური საშულებებით არის აღჭურვილი, რაც საშუალებას აძლევს, მაქსიმალურად ზღვის სიღრმეში განახორციელოს სამძებრო სამუშაოები.

სამუშაოებს ნაპირიდან ადევნებენ თვალს სამხედროების ოჯახის წევრები და ახლობლები.