საქართველოს პრემიერ–მინისტრი გიორგი კვირიკაშვილი ნინოწმინდის მოსახლეობას შეხვდა. პრემიერმა „ქართული ოცნება–დემოკრატიული საქართველოს“ მხარდამჭერებს პარტიის მაჟორიტარი დეპუტატობის კანდიდატი ენზელ მკოიანი წარუდგინა და მოსახლეობას მომავალი 4 წლის სამოქმედო გეგმა გააცნო.

„მომავალი 4 წლისთვის ჩვენ გვაქვს გაწერილი გეგმა, თუ როგორ უნდა მოვახდინოთ ქვეყნის სწრაფი მოდერნიზაცია, რათა ჩვენი ინფრასტრუქტურა, პირველ რიგში სატრანზიტო და რეგიონული ინფრასტრუქტურა, იყოს თანამედროვე სტანდარტებთან შესატყვისი. საჭიროა ძირეული რეფორმების გატარება განათლების სისტემაში იმისთვის, რომ უმაღლესი განათლების მქონე ახალგაზრდები პირდაპირ დასაქმდნენ და აღარ დახარჯონ დრო და რესურსები იმ პროფესიებზე, რომლებიც დღეს ნაკლებად მოთხოვნადია,“ – აღნიშნა პრემიერმა.

სიტყვით გამოსვლისას მთავრობის მეთაურმა ასევე ისაუბრა ნინოწმინდაში მიმდინარე ინფრასტრუქტურულ პროექტებზე.  

„ძალიან ბევრი საქმე კეთდება ნინოწმინდაში, მათ შორის ნინოწმინდა–ბავრას გზა, რომელიც იქნება თანამედროვე სტანდარტების შესაბამისი. ხორციელდება ირიგაციის პროექტები, რაც ძალიან მნიშვნელოვანია სოფლის მეურნეობის განვითარებისთვის; ასევე სხვადასხვა სოფლების გაზიფიცირების პროექტი, რომელიც მომავალშიც გაგრძელდება და დაფარავს სხვა სოფლებსაც",– აღნიშნა გიროგი კვირიკაშვილმა.