"ერთიანი ნაციონალური მოძრაობის" ლიდერები დავით ბაქრაძე და გიგი წერეთელი ქუთაისში ახალგაზრდებს შეხვდნენ, სადაც პარტიის ახალგაზრდულ პოლიტიკაზე, ახალგაზრდების დასაქმების პერსპექტივასა და მაღალი ხარისხის დასავლური განათლების მიღებაზე ისაუბრეს.

ნაციონალური მოძრაობის ერთ-ერთი ლიდერისა და ქუთაისის 49-ე ოლქის მაჟორიტარი დეპუტატობის კანდიდატ გიგი წერეთლის თქმით, ის შეთავაზება, რომელიც პარტიას აქვს სწორედ ახალგაზრდების უკეთესი მომავლისთვის არის ძალიან მნიშვნელოვანი.

"ჩვენი მთავარი ამოცანაა, რომ ახალგაზრდები უკეთეს გარემოსა და ქვეყანაში ცხოვრობდნენ. ქვეყნაში, რომელშიც არ იქნება კორუფცია და ნეპოტიზმი. ქვეყანაში, სადაც იქნება მეტი საშუალება, ისწავლონ, გამოავლინონ ნიჭი და უნარი, სადაც მათ არავინ დაჩაგრავს იმის გამო, რომ ვინმეს ნათესავები ან მდიდარი/გავლენიანი ოჯახის წევრები არ არიან“, - აღნიშნა წერეთელმა.

პარტიის ლიდერება ასევე ქუთაისის, როგორც ქვეყნის პოლიტიკური ცენტრის შექმნის აუცილებლობაზე იმსჯელეს და ახალგაზრდების კითხვებს მათთვის პრობლემურ საკითხებზე უპასუხეს.

ამასთან, ერთიანი ნაციონალური მოძრაობის ლიდერის დავით ბაქრაძის თქმით, ნაციონალური მოძრაობის მიერ მომზადებული პროგრამის განხორციელება შექმნის გარემოს, სადაც დასავლური განათლების მიღების შემდეგ ნებისმიერი ახალგაზრდა საკუთარი თავის რეალიზებას შეძლებს.