აჭარის სოფლის მეურნეობის სამინისტროს 2017 წლის პროგრამული ბიუჯეტი 6 მლნ 300 ათას 400 ლარით განისაზღვრა
აჭარის მთავრობის თავმჯდომარე ზურაბ პატარაძე აჭარის სოფლის მეურნეობის სამინისტროს 2017 წელს დაგეგმილი პროგრამებისა და ქვეპროგრამების საჯარო განხილვას დაესწრო.
ღონისძიებას საქართველოს სოფლის მეურნეობის მინისტრი, მინისტრის მოადგილეები, აჭარის უმაღლესი საბჭოს, რეგიონის მუნიცპალიტეტის გამგეობებისა და საკრებულოების, ასევე, შოთა რუსთავლის სახელმწიფო უნივერსიტეტის, მედიის, არასათავრობო ორგანიზაციების წარმომადგენლები და ფერმერები ესწრებოდნენ.
,,აჭარის მოსახლეობამ უნდა იგრძნოს სარგებელი იმ პროექტებიდან, რომლებიც დღეს დაგეგმილი აქვს სოფლის მეურნეობის სამინისტროს. მაღალმთიან აჭარაში მოსახლეობასთან შეხვედრების დროს, სოფლის მეურნეობის მინისტრთან ერთად დავაანონსეთ სხვადასხვა პროექტი, რაც ძალიან მნიშვნელოვანია ჩვენი რეგიონის განვითარებისთვის. მთელი აჭარა უნდა იყოს დასაქმებული. ჩვენ ყველაფერი უნდა გავაკეთოთ ამისთვის. მეტი სერვისები, მეტი პროდუქტები, მეტი პროექტები- ეს არის ჩვენი გზავნილი"-აღნიშნა მთავრობის თავმჯდომარემ.
აჭარის სოფლის მეურნეობის მინისტრმა, ლაშა კომახიძემ, 2017 წელს განსახორციელებელი პროგრამები წარადგინა და მათი სპეციფიკის შესახებ ისაუბრა. კერძოდ: სოფლის მეურნეობის განვითარება მაღალეფექტური ტექნოლოგიების დანერგვის გზით; განსახორციელებელი აგროპროექტების მართვა, რომლის ფარგლებში შეიქმნება ა(ა)იპ აგროპროექტების მართვის ცენტრი; სოფლის მეურნეობისა და სოფლის განვითარების ხელშეწყობა - ა.მ.ა.გ.ი, რომელიც ისახავს მიზნად აქტიურ მოქალაქეთა ადგილობრივ გაერთიანებას (სულ შეიქმნება 57 ამაგი).
პროგრამების ფარგლებში იგეგმება სასათბურე მეურნეობის განვითარების ხელშეწყობა, მაღალეფექტური ერთწლიანი სასოფლო-სამეურნეო კულტურების წარმოების განვითარების ხელშეწყობა, რომლის ფარგლებში 23 ჰა-ზე გაშენდება ნიორის კულტურა.
სამინისტროს 2017 წლის პროგრამული ბიუჯეტი განისაზღვრა 6 300 400 ლარით, რაც 2016 წლის პროგრამების ბიუჯეტთან შედარებით 2 741 354 ლარით მეტია.
