საქართველოს პირველი ვიცე-პრემიერი დიმიტრი ქუმსიშვილი რუსთავში „მაკდონალდსის“ ახალი რესტორნის ოფიციალური გახსნის ღონისძიებას  დაესწრო. რესტორანი, რომელიც რუსთავში, მეგობრობის გამზირზე აშენდა,  საქართველოს მასშტაბით, „მაკდონალდსის“ ქსელის რიგით მე-11  სწრაფი კვების ობიექტია, რომელშიც 62 ადამიანია დასაქმებული. კომპანიის წარმომადგენლების განცხადებით, „მაკდონალდსის“ ეს რესტორანი განსაკუთრებულია, რადგან გამოირჩევა მომსახურების ახალი, ეფექტური პლატფორმით, აღჭურვილია თანამედროვე ტექნოლოგიებით და მასში მოქმედებს 24 საათიანი „დრაივის“ სერვისი. დიმიტრი ქუმსიშვილტან ერთად „მაკდონალდსის“ გახსნის ღონისძიებას რუსთავის მუნიციპალიტეტის მერი დავით ჯიქია და ბიზნესმენი თემურ ჭყონია ესწრებოდნენ.

„ეს არის სახელმწიფოს, კერძო სექტორისა და მუნიციპალიტეტის თანამშრომლობის ძალიან კარგი მაგალითი. აქ შეიქმნა არა უბრალოდ სწრაფი კვების ობიექტი, არამედ მეგობრული ეკოსისტემა ახალგაზრდებისთვის, ბავშვებისთვის, ყველა იმ პირისთვის, ვისაც უნდა დასვენება და ხარისხიანი მომსახურეობის მიღება“ - აღნიშნა დიმიტრი ქუსმიშვილმა

პირველი ვიცე-პრემიერის თქმით,  მნიშვნელოვანია, რომ ასევე შეიქმნა სკვერი და გარემონტდა ის შენობები, რომლებიც არის „მაკდონალდსის“ მიმდებარე ტერიტორიაზე.

„თვითონ რესტორანში ჩადებულია 5 მილიონის ინვესტიციები და ეს იყო სწორედ ის ვალდებულება, რომელიც კომპანიას ჰქონდა სახელმწიფოს წინაშე აღებული. დღეს რესტორანში 62 ადამიანია დასაქმებული, ისინი არიან სულ რუსთაველები და შესაბამისად, სწორედ მათ მიეცათ დასაქმების შესაძლებლობა. მე მინდა დიდი მადლობა გადავუხადო კომპანიის დამფუძნებლებს და მენეჯმენტს იმიტომ, რომ მათ რუსთავში ნამდვილად მოახერხეს და მოაწყვეს ზეიმი. ასევე მინდა მივულოცო რუსთაველებს, რომლებსაც აქვთ შესაძლებლობა დღეს უკვე თავიანთ ქალაქში მიიღონ იმ სტანდარტის მომსახურება, რომელსაც ქართული „მაკდონალდსი“ გვთავაზობს“ - განაცხადა დიმიტრი ქუმსიშვილმა.

რუსთავის „მაკდონალდსის“ საბავშვო ტერიტორია მოიცავს დაბადების დღის დარბაზსა და სათამაშო ზონას, „დრაივი“ კი მომხმარებლებს 24 საათის განმავლობაში ემასახურება.  რესტორანი ადაპტირებულია შეზღუდული შესაძლებლობების მქონე პირებისთვის.

მაკდონალდსის მთლიან ქსელში დასაქმებულთა საერთო რაოდენობა, ამ ეტაპისთვის, 828 ადამიანს შეადგენს. საქართველოში „მაკდონალდსის“ პირველი რესტორანი 1999 წელს გაიხსნა და დღეს უკვე 11 ფილიალი აქვს -  თბილისში, ბათუმში,  ქუთაისში, ზუგდიდსა და რუსთავში.