აჭარამ შესაძლოა ევროპის რეგიონთა ასამბლეის გასვლით სხდომებს და პლენუმებს უმასპინძლოს. წინადადება აჭარის მთავრობის თამჯდომარემ ზურაბ პატარაძემ ორგანიზაციის პრეზიდენტს ჰანდე ბოზათლის პირისპირ შეხვედრისას შესთავაზა. ორმხრივ შეხვედრას აჭარის ფინანსთა და ეკონომიკის მინისტრი რამაზ ბოლქვაძე ესწრებოდა. მხარეებს შორის საუბარი ევროპის რეგიონთა ასამბლეის შავი ზღვის მე-6 სამიტის მიმდინარეობას, ასევე, დაგეგმილ ერთობლივ ღონისძიებებს, პოლიტიკური,კულტურულ-ჰუმანიტარული და სავაჭრო-ეკონომიკური კუთხით თანამშრომლობას შეეხო.
ევროპის რეგიონთა ასამბლეის სამიტი საქართველოში პირველად ტარდება და მას ევროპის წამყვანი რეგიონების 80-მდე დელეგატი ესწრება.
აჭარის რეგიონის შესახებ სტუმრების წინაშე სპეციალური პრეზენტაციით აჭარის მთავრობის წარმომადგენლები წარსდგენ. შეხვედრის ფარგლებში 2014-2020 წლების ერთობლივი სამოქმედო პროგრამის პრეზენტაცია გაიმართა.
ევროპის რეგიონთა ასამბლეა წარმოადგენს რეგიონთაშორისი თანამშრომლობის ფორუმს და ევროპის დონეზე რეგიონთა ინტერესების დაცვის ფართო ქსელს, რომელშიც ევროპის 35 ქვეყნის რეგიონი და 15 რეგიონთაშორისი ორგანიზაციაა გაერთიანებული. საქართველოს ერას ასამბლეაში ჯერ-ჯერობით მხოლოდ აჭარა და გურიაა წარმოდგენილი. აჭარის ავტონომიური რესპუბლიკა 1997 წელს გახდა ევროპის რეგიონთა ასამბლეის სრულუფლებიანი წევრი.
სხვა ევროპულ ორგანიზაციებთან ერთად, ერა უმნიშვნელოვანეს როლს ასრულებს რეგიონულ დონეზე ქვეყნების ევროპული ინტეგრაციის ხელშეწყობაში.
ევროპის რეგიონთა ასამბლეის შავი ზღვის სამიტი აჭარის ავტონომიური რესპუბლიკის მთავრობის მხარდაჭერითა და ორგანიზებით ტარდება.