"ჩვენი კატეგორიული მოთხოვნაა - გაემიჯნოს საზოგადოებრივი მაუწყებელი ამ ეგზიტპოლში მონაწილეობას, ეს იქნება დამღუპველი საზოგადოებრივი მაუწყებლისთვის, მისი იმიჯისათვის, რომელიც „ნამცეც-ნამცეც აიკინძა ამ 4 წლის განმავლობაში“, - განაცხადა ,,ირაკლი ალსანია-თავისუფალი დემოკრატების“ საარჩევნო შტაბის ხელმძღვანელმა გიორგი ცაგარეიშვილმა პარტიის ოფისში გამართულ ბრიფინგზე.

„2016 წლის 7 სექტემბერს  საზოგადოებრივ  მაუწყებელში გამართულ სამეურვეო საბჭოს სხდომაზე  გადაწყვეტილებას სხვა კომერციულ მაუწყებლობებთან ერთად ეგზიტპოლების ჩატარებასთან დაკავშირებით  საზოგადოებრივი მაუწყებლის სამეურვეო საბჭომ უმრავლესობით დაუჭირა მხარი.

,,თვალშისაცემია ის, რომ ეს კონტრაქტი ფაქტობრივად დასასრულს უახლოვდება თუ უკვე გაფორმებული არ არის  საზოგადოებრივი მაუწყებლის მიერ. დღეს გავრცელდა ინფორმაცია, რომ საზოგადოებრივი მაუწყებელი კვლავ ჯიუტად გეგმავს  ამ სამ კერძო მაუწყებელთან ერთად გააფორმოს კონტრაქტი მკვლევარ კომპანიასთან, რომელიც ეგზიტპოლებს  არჩევნების დღეს გამოაქვეყნებს“, -  განაცხადა გიორგი ცაგარეიშვილმა.

 გიორგი ცაგარეიშვილი ფიქრობს, რომ  ეს იქნება დამღუპველი საზოგადოებრივი მაუწყებლისთვის, მისი იმიჯისათვის, რომელიც „ნამცეც-ნამცეც აიკინძა ამ 4 წლის განმავლობაში იმ საშინელი მემკვიდრეობიდან, რომელიც დარჩა საზოგადოებრივ მაუწყებლობას ნაციონალური მოძრაობისგან და მიხეილ სააკაშვილისგან“. მისი აზრით,  დღეს,  ავად თუ კარგად,  საზოგადოებრივი მაუწყებელი გათავისუფლებულია, მაგრამ  საქართველოს ხელისუფლება ახლაც ცდილობს როგორმე დააკნინოს, დაამციროს საზოგადოებრივი მაუწყებელი, ჩართოს ამ გაუგებარ პროექტში, პოლიტიკურად ანგაჟირებული გახადოს არხი და აქციოს მხარედ.

 „ჩვენი კატეგორიული მოთხოვნაა - გაემიჯნოს საზოგადოებრივი მაუწყებელი ამ ეგზიტპოლში მონაწილეობას. ჩვენ  ერთი ბრიფინგი მივუძღვენით ამ მოვლენას, ვუძღვნით კიდევ ერთ ბრიფინგს, მომავალშიც ჩავატარებთ ამ მოვლენის მონიტორინგს. შეგახსენებთ, რომ საზოგადოების ზურგს უკან დაჩქარებული წესით გამოიყო ამ პროექტში მონაწილებისთვის 200 000 ლარი. თუ გადავხედავთ ამ კონტრაქტის წინაპირობებს, შეიძლება დაისვას კითხვა - რა დოზით მონაწილეობს საზოგადოებრივი მაუწყებელი ამ პროექტის განხორციელებაში.  მე შემიძლია გაგცეთ პასუხი,  რომ სხვა თანამონაწილეებთან შედარებით, რა თქმა უნდა, მცირე დოზით, მაგრამ მაინც არის გამოყოფილი თანხა. ეს პატარა თანხა არ არის“, - ამბობს  ,,თავისუფალი დემოკარტების“ საარჩევნო შტაბის ხელმძღვანელი და ადასტურებს, რომ აქ მხოლოდ თანხაში არ არის საქმე,  საქმე იმაშია, რომ დანარჩენმა სამმა მაუწყებელმა და მათ უკან მდგომმა პოლიტიკურმა ფიგურებმა, რომლებიც ჯერჯერობით არ ჩანან, ყველაფერი გააკეთეს იმისთვის, რომ „გაეპრავებინათ’“ ეს ეგზიტპოლები. „ამ ეგზიტპოლების სანდოობისთვის ჩართეს საზოგადოებრივი მაუწყებელიც, რათა გამოეყენებინათ მისი ეთერი, მისი მატერიალური რესურსები იმისთვის, რომ საზოგადოებისთვის გაურკვეველი ეგზიტპოლები შეეჩეჩებინათ“, - განაცხადა გიორგი ცაგარეიშვილმა.