ამერიკის შტატის ჩრდილოეთ კაროლინას გუბერნატორმა ქალაქ შარლოტში საგანგებო მდგომარეობა გამოაცხადა. ქალაქში უკვე მეორე დღეა პოლიციელების მიერ აფროამერიკელის მოკვლის გამო საპროტესტო აქციები მიმდინარეობს. შარლოტში გაგზავნილია ეროვნული გვარდიაც.

არეულობების შედეგად უკვე 15 პოლიციელია დაშავებული. წესრიგის დამცველებმა დემონსტრანტების წინააღმდეგ უკვე რამდენჯერმე გამოიყენეს ცრემლსადენი გაზი.

დემონსტრაცია თავდაპირველად მშვიდობიან ხასიათს ატარებდა, თუმცა შემდეგ აქციის მონაწილთა შორის სროლის ხმა გაისმა. დაიჭრა ერთ-ერთი დემონსტრანტი, რომელიც მოგვიანებით კლინიკაში გარდაიცვალა. გავრცელებული ინფორმაციით, მას პოლიციელის ტყვია მოხვდა, თუმცა ქალაქის ხელისუფლების წარმომადგენელთა თქმით, ის აქციის სხვა მონაწილის ტყვიამ იმსხვერპლა. 

ორი დღის წინ პოლიციელების მიერ დაჭრილი  43 წლის აფროამერიკელი კიტ ლამონტ სკოტი საავადმყოფოში გარდაიცვალა.

პოლიციაში ამტკიცებენ, რომ სკოტი შეიარაღებული იყო და საფრთხეს წარმოადგენდა, თუმცა მისი ნათესავები ირწმუნებიან, რომ მამაკაცს იარაღი არ ჰქონია.