თურქეთის უსაფრთხოების ძალების სამი თანამშრომელი დაიღუპა ქურთების მუშათა პარტიის წევრების თავდასხმის შედეგად. ინციდენტი ქვეყნის სამხრეთ-აღმოსავლეთ ნაწილში, ჰაკარის პროვინციაში მოხდა. სააგენტო DHA-ს ინფორმაციით, თავდასხმა იმ დროს მოხდა, როდესაც ძალოვანები ერთ-ერთ საცხოვრებელ კვარტალში პატრულირებდნენ. თავდასხმის შედეგად დაჭრილია ორი სამართალდამცველიც. შემთხვევის ადგილზე და მის მიმდებარედ ქურთი ამბოხებულების გასანეიტრალებლად დაწყებულია სპეცოპერაცია.

თურქეთში 2015 წლის ივლისიდან ქურთების მუშათა პარტიასთან კონფლიქტის განახლების შემდეგ 700 თურქი სამხედრო და პოლიციელი დაიღუპა. თურქეთის ხელისუფლების განცხადებით, ამ ხნის განმავლობაში 7 ათასი ქურთი ამბოხებულის ლიკვიდაცია მოხდა.