თბილისის ვიცე-მერი ლაშა აბაშიძე, რიგის ვიცე-მერს, ანდრის ამერიკსის შეხვდა. თბილისის მერიაში გამართულ შეხვედრას ლატვიის რესპუბლიკის საგანგებო და სრულუფლებიანი ელჩი საქართველოში იანის ზლამეცი და რიგის მერიის წარმომადგენლები დაესწრნენ.

ვიცე-მერთან  გამართულ შეხვედრაზე ორ ქალაქს შორის თანამშრომლობაზე ისაუბრეს. ლაშა აბაშიძის თქმით, თბილისსა და რიგას შორის ხელმოწერილი დოკუმენტის შესაბამისად, ქალაქები ერთმანეთთან რამდენიმე მიმართულებით თანამშრომლობენ და საზოგადოებრივი ცხოვრების სხვადასხვა  სფეროში  ერთობლივ პროგრამებში მონაწილეობენ. აღსანიშნავია, რომ 2017 წელი ორ ქალაქს შორის პარტნიორობის შეთანხმების გაფორმების საიუბილეო წელია. 

თბილისსა და რიგას შორის თანამშრომლობის შესახებ შეთანხმებას ხელი მოეწერა2007 წლის 3 აპრილს. იგი საზოგადოებრივი ცხოვრების, განათლების, კულტურის, ტურიზმისა და ეკონომიკის სფეროებში ქალაქებს შორის თანამშრომლობის გაღრმავებას  და ერთობლივ პროექტებში მონაწილეობას ითვალისწინებს. ერთმანეთის გამოცდილების გაზიარების მიზნით ქალაქებმა რამდენჯერმე გაცვალეს დელეგაციები.

ბოლო წლებში თბილისს  რიგის დუმის იურიდიული, საზოგადოებასთან და მედიასთან ურთიერთობების, განათლების, კულტურისა და სპორტის, საერთაშორისო ურთიერთობებისა და სხვა სამსახურების წარმომადგენლები სტუმრობდნენ.