დღეს  პრეზიდენტი გარკვეული დანაშაულის გამკაცრების კანონპროექტს მოაწერს ხელს, - ამის შესახებ პრეზიდენტის საპარლამენტო მდივანმა ანა დოლიძემ ჟურნალისტებს განუცხადა.

მისი თქმით,  პრეზიდენტთან ხელმოსაწერად საქართველოს პარლამენტის მიერ მიღებული კანონ-პროექტი შემოვიდა, რომლის მიხედვითაც მკაცრდება პასუხისმგებლობა გარკვეულ დანაშაულებებზე.

„მაგალითად ცემა, რომელიც ჩადენილი იქნება ორსული ცოლის მიმართ, მკაცრდება. მკაცრდება პასუხისმგებლობა წამებაზე, იზრდება სანქცია წამებასთან დაკავშირებით. უფრო მკაცრად დაისჯება წამება, რომელიც ჩადენილია სამედიცინო მანიპულაციებით. ზოგადად, ჩვენ წამებასთან და ძალადობასთან ბრძოლის საქმეში ეს პოზიტიურ ცვლილებად მიგვაჩნია და საქართველოს პრეზიდენტი ამ პროექტს ხელს დღეს მოაწერს“,- აღნიშნა ანა დოლიძემ.