დიდი ბრიტანეთის საკვები პროდუქტების სტანდარტების სააგენტოს (FSA ) ექსპერტები აცხადებენ, რომ პური და კარტოფილი მანამდე უნდა შეიწვას, ვიდრე ოქროსფერი არ გახდება, და არა გაყავისფრებამდე, რათა თავიდან ავიცილოთ აკრილამიდის წარმოქმნა, რომელიც კიბოს გამომწვევია.

აკრილამიდი იმ შემთხვევაში წარმოიქმნება, როდესაც სახამებლის შემცველი პროდუქტები ტოსტერში, ტაფაზე ან გრილზე ძალიან დიდი ხნის განმავლობაში ან მაღალ ტემპერატურაზე იწვება.

აკრილამიდის გაცილებით მაღალი დონე დაფიქსირდა სახამებლის შემცველ პროდუქტებში (პური, კარტოფილი, ფაფები, ნამცხვარი, ყავა), რომელიც 120 გრადუსზე მაღალ ტემპერატურაზე მზადდებოდა.

მეცნიერების თქმით, ტოსტერში შემწვარი პური რაც უფრო ყავისფერია, მით უფრო მაღალია მასში აკრილამიდის დონე.

ცხოველებზე ჩატარებული ცდების შემდეგ დადგინდა, რომ აკრილამიდი აზიანებს დნმ-ს და იწვევს სიმსივნეს, თუმცა მეცნიერებს ჯერ დარწმუნებით იმის თქმა არ შეუძლიათ, ანალოგიურად ზემოქმედებს თუა არა ადამიანებზე ეს ნივთიერება.

ამასთან FSA-ს სპეციალისტები შიშობენ, რომ თანამედროვე ადამიანი საშუალოდ ზედმეტად დიდი რაოდენობით აკრილამიდს იღებს და ურჩევენ მათ მიმართონ ჯანსაღ დიეტას.

აკრილამიდს ასევე შეიცავს თამბაქოს კვამლი, ამიტომ არამწეველებთან შედარებით მწეველები მას 3-4-ჯერ უფრო მეტი რაოდენობით მოიხმარენ.

მეცნიერთა რჩევით ასევე დაუშვებელია კარტოფილის მაცივარში შენახვა, რადგან დაბალ ტემპერატურაზე მასში წარმოიქმნება შაქრის მაღალი დონე, რამაც შესაძლოა კერძის დამზადების დროს აკრილამიდის გამოყოფის ზრდა გამოიწვიოს.