პარლამენტის ყოფილი თავმჯდომარე დავით უსუფაშვილი პრეზიდენტის არაპირდაპირი არჩევის მომხრეა. ,,იმედის დროში“ მან განაცხადა, რომ ამ ტიპის მოდელი შესაძლოა აღმოჩნდეს შეთანხმების საგანი ბევრ პოლიტიკურ ძალას შორის.

,,ჩვენ გვმართებს ნაბიჯების ერთმანეთისკენ გადადგმა. ამ ტიპის მოდელი შესაძლოა აღმოჩნდეს შეთანხმების საგანი ბევრ პოლიტიკურ ძალას, ბევრ პოლიტიკურ ლიდერს შორის, რაც ამ თემაზე არასასურველ ვნებათაღელვებს გადაგვატანინებს და სხვა თემებზე ჩაღრმავებას შეგვაძლებინებს”, - აღნიშნა უსუფაშვილმა. 

იგი იმედოვნებს, რომ კონსტიტუციაში განსახორციელებელ ცვლილებებთან დაკავშირებით ”ქართული ოცნების” კონკრეტული წინადადებები და პოზიციები უახლოეს პერიოდში გახდება ცნობილი.

”ახლა ძალიან მნიშვნელოვანია, რომ ძალიან ბევრ წინადადებასთან ერთად, რომელიც შეტანილია სახელმწიფო საკონსტიტუციო კომისიაში, ჩვენ თავად მმართველი პარტიის წარმომადგენლების წინადადებები ვნახოთ. მესმის ბატონი მდინარაძის (მამუკა მდინარაძე), რომელიც ამბობს, რომ ფრაქციის ხელმძღვანელია და არ უნდა დააფიქსიროს წინადადება, მაგრამ მეორე მხრივ, ის საკონსტიტუციო კომისიის წევრია და აქედან გამომდინარე, ჩვენ კომისიის წევრის სტატუსიდან გამომდინარე, გვინდა მოსაზრებების და წინადადებების მოსმენა. ცხადია, ყველას გვაინტერესებს ერთმანეთის პოზიციები და არა ზოგადი თეორიები - რომ ესეც არსებობს და ისიც არსებობს”, - აღნიშნა დავით უსუფაშვილმა.