აერონავტიკისა და კოსმოსური სივრცის ეროვნულმა სამმართველომ (NASA) 40 სინათლის წლით დაშორებულ სისტემაში, დედამიწის ზომის შვიდი პლანეტა აღმოაჩინა. სამმართველოს განცხადებით, შვიდივე პლანეტას დედამიწის მსგავსი ან მასზე ნაკლები მასა აქვს.

მეცნიერების თანახმად, ტემპერატურა ამ პლანეტებზე საკმარისად დაბალია იმისთვის, რომ ზედაპირზე წყალი თხევად მდგომარეობაში იყოს, რადგან პლანეტები სიცოცხლისთვის საუკეთესო ანუ ვარსკვლავიდან ისეთ მანძილზე არიან, რომ იქ თხევადი წყლის არსებობაა შესაძლებელი.

აღმოჩენილი პლანეტების ორბიტები მცირე ზომის, ულტრა-ცივი (ტემპერატურის მიხედვით) ვარსკვლავის გარშემოა. ვარსკვლავს „ტრეპისტ-1“ ეწოდება.

ის სხვა ჯუჯა ვარსკვლავს, „პროქსიმა ცენტავრს“ ჰგავს, რომელიც დედამიწიდან სულ 4.2 სინათლის წლით არის დაშორებული. გასულ წელს მეცნიერებმა მის ორბიტაზე, ასევე სიცოცხლისთვის შესაფერის ზონაში, დედამიწის მსგავსი პლანეტა, სახელად „პროქსიმა ბი“ აღმოაჩინეს.

გასულ წელს, ასტრონომებს დედამიწის ზომის სამი პლანეტა უკვე აღმოჩენილი ჰქონდათ. ის პლანეტები ეგრეთწოდებულ „ტრანზიტებზე“ დაკვირვებით აღმოაჩინეს. „ტრანზიტის“ დროს პლანეტა მზის წინ გაივლის და მის ნათებას ამცირებს.

ამიტომ მკვლევარებმა გადაწყვიტეს ვარსკვლავს თვეების განმავლობაში დაკვირვებოდნენ. მათი მუშაობის შედეგად, კიდევ ოთხი პლანეტა აღმოაჩინეს. მეცნიერთა მტკიცებით, შესაძლოა ყოველ მათგანს ზედაპირზე, პოტენციურად თხევადი წყალი ჰქონდეს.

მკვლევარები ამბობენ, რომ პლანეტები დაახლოებით დედამიწის და ვენერის ზომისაა, მაგრამ ჩვენს მზის სისტემასთან მსგავსება ამით მთავრდება. მათი თქმით, „ტრეპისტ-1“-თან რაც არის დაკავშირებული, ყველაფერი მცირე ზომისაა, ვარსკვლავის ჩათვლით. ზომით, ის დაახლოებით ჩვენი მზის 8 პროცენტია და მზის სისტემის უდიდეს პლანეტა, იუპიტერზე ოდნავ დიდია. ამიტომ როგორც მეცნიერები ამბობენ, ჩვენი სისტემისგან განსხვავებით, შვიდივე პლანეტა ბევრად უფრო ახლო ორბიტაზე მოძრაობს.

აღმოჩენა, რომლის შესახებაც მეცნიერები საუბრობენ, მხოლოდ დასაწყისია.  2018 წელს ჯეიმს ვების კოსმოსური ტელესკოპი  ორბიტაზე გავა და “ტრეპისტ-1“-ის გარშემო მოძრავი პლანეტების უფრო მკაფიო სურათის მოპოვებას შეძლებს.