მოსკოვი არ აპირებს ჩარევას ყატარის ირგვლივ აგორებულ დიპლომატიურ სკანდალში, რომელმაც დოჰასა და შვიდ არაბულ ქვეყანას შორის დიპლომატიური ურთიერთობის გაწყვეტა გამოიწვია.  

ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა და აღნიშნა, რომ ეს საკითხი მხოლოდ ორმხრივ ურთიერთობას ეხება.

 „ეს მათი საქმეა, ეს ამ სახელმწიფოების ორმხრივი ურთიერთობის საკითხია. ჩვენ ამ გადაწყვეტილებებში არ ვერევით, იმის მიუხედავად, რომ ყოველთვის გვადანაშაულებენ იმაში, რომ მსოფლიოში განვითარებული მოვლენების უკან ყოველთვის ჩვენ ვდგავართ, გარწმუნებთ, რომ ეს ასე არ არის“, -განაცხადა მინისტრმა.

არაბული სახელმწიფოები (საუდის არაბეთი, არაბეთის გაერთიანებული საემიროები, ბაჰრეინი, ეგვიპტე, ლიბია მალდივები) ყატარს რეგიონში დესტაბილიზაციასა და ტერორისტული ორგანიზაციების დაფინანსებაში ადანაშაულებენ. მათ შორის იემენში ტერორისტული დაჯგუფებების, „ალ-ქაიდასა და „ისლამური სახელმწიფოს“ მხარდაჭერაში.