ესპანეთის პოლიციამ ცნობილი ბრიტანელი ექსპრესიონისტის ფრენსის ბეკონის ხუთი მოპარული ნახატიდან სამი ნამუშევარი იპოვა. ამის შესახებ გაზეთი Pais-ი წერს.

უცნობია, რომელ ტილოებზეა საუბარი, ან სად აღმოაჩინეს ისინი.

25-30 მლნ ევროს ღირებულების ხუთი ნახატი 2015 წლის ივნისში მხატვრის ახლო მეგობრის ხოსე კაპელოს სახლიდან მოიპარეს. მას ნამუშევრები მხატვრისგან მემკვიდრეობით ერგო.

ძარცვის დროს სახლში არავინ იმყოფებოდა.  დამნაშავეებმა სიგნალიზაცია გამორთეს და ტერიტორია ანაბეჭდების გარეშე დატოვეს. ნახატების გარდა დამნაშავეებმა სხვა ძვირფასი ნივთებიც წაიღეს.

ეს ძარცვა ქვეყნის ისტორიაში მასშტაბურ დანაშაულად აღიარეს.

ბეკონი თავისი სიცოცხლის განმავლობაში ხშირად სტუმრობდა მადრიდს. ის 1992 წელს 82 წლის ასაკში გარდაიცვალა.

ბეკონის ნამუშევრები კოლექციონერებს შორის დიდი პოპულარობით სარგებლობს.

2007 წელს ყატარელმა შეიხმა მისი ნახატი 53 მლნ დოლარად შეიძინა. 2008 წელს კი Sotheby's-ის აუქციონზე რომან აბრამოვიჩმა მხატვრის ნამუშევარი „ტრიპტიხი, 1976“ 86,3 მლნ დოლარად იყიდა. 2013 წელს Christie's-ის აუქციონზე ბეკონის ნახატი „სამი ჩანახატი ლუსიენ ფრეიდის პორტრეტისთვის“ რეკორდულ ფასად - 142,4 მლნ დოლარად გაიყიდა.