იამაიკაზე 117 წლის ასაკში ჩვენი პლანეტის ყველაზე ხანდაზმული ქალი გარდაიცვალა. მოს ბრაუნი აპრილიდან მსოფლიოს ყველაზე ასაკოვან ქალად იყო მიჩნეული. ქალის გარდაცვალების შესახებ  Twitter-ის გვერდზე ქვეყნის პრემიერ-მინისტრმა ენდრიუ ჰოლნესმა დაწერა.

 „მსოფლიოში ჩვენი ყველაზე ხანდაზმული ქალი მისის ვაიოლეტ მოს ბრაუნი გარდაიცვალა. ის 117 წლის იყო. განისვენეთ მშვიდად, მისის ბრაუნ“, - წერს პრემიერ-მინისტრი.

ყველაზე მხცოვანი ქალი იამაიკის ქალაქ ტრელონში 1900 წლის მარტში დაიბადა. მიმდინარე წლის აპრილში იტალიელი ემა მორანის გარდაცვალების შემდეგ ვაიოლეტი დედამიწის ხანდაზმულ ქალად აღიარეს.

რამდენიმე წლის წინ ადგილობრივ პრესასთან ინტერვიუში მან აღნიშნა, რომ თავის ასაკს ვერ გრძნობს, დღეგრძელობის შენარჩუნებაში კი მას ქათმისა და ღორის ხორცზე, ასევე ალკოჰოლზე უარის თქმა ეხმარება.