ვალერი გელაშვილის ცემის ფაქტზე, საქართველოს ყოფილი პრეზიდენტის, მიხეილ სააკაშვილის სასამართლო პროცესი დასრულდა. შემდეგი პროცესი 19 თებერვალსააჩანიშნული და ბრალდების მხარე ლიტველ ექსპერტს სკაიპის საშუალებით დაკითხავს.

დღევანდელ პროცესზე ბრალდების მხარემ კონტრდაზვერვის ყოფილი უფროსი, შალვა ჟღენტი დაკითხა.

პროკურორ არჩილ ტყეშელაშვილის განცხადებით, კონტრდაზვერვის ყოფილმა უფროსმა დაადასტურა, რომ 2005 წლის ივლისის თვეში კანცელარიაში სააკაშვილთან ნამდვილად გაიმართა შეხვედრა, რომელსაც ესწრებოდა სპეციალური ოპერატიული დეპარტამენტის, სპეცრაზმის უფროსი, ვახტანგ ზუხბაია.

,,მისი ჩვენების მიხედვით, როცა ეს შეხვედრა დასრულდა, მიხეილ საკაშვილმა ვახტან ზუხბაიას მადლობაც კი გადაუხადა, ვალერი გელაშვილზე განხორციელებული თავდასხმისთვის. ეს თავდასხმა ისე იყო შესრულებული, როგორც მე მინდოდაო, ეს სიტყვები უთხრა მას სააკაშვილმა"- განაცხადა პროკურორმა.

დაცვის მხარის შეფასებით კი სააკაშვილის მიმართ საქართველოში პოლიტიზირებული საქმეები მიმდინარეობს.

,,სააკაშვილის მიმართ ქართულ სასამართლოებში გრძელდება ის შოუ, რომელიც დიდი ხნის წინ დაიწყო. ეს არის საქმე, რომლის მთელი კასკადიც ბურჯანაძეზე და ოქრუაშვილზეა აწყობილი. დანარჩენი მოწმეები პირდაპირ ჩვენებას ვერ იძლევიან, როგორც ჩანს, მოწმე ოქრუაშვილი ვერ მოჰყავთ, სავარაუდოდ ის ხელისუფლებას რაღაცაზე ევაჭრება და ამ ვაჭრობაში ძალიან დიდი დრო დაკარგეს",- განაცხადა ადვოკატმა გიორგი ჩივიაშვილმა.

საქართველოს პარლამენტის წევრ ვალერი გელაშვილზე 2005 წელს მომხდარი შეიარაღებული თავდასხმის და მისი ცემის საქმეზე, ბრალი საქართველოს ყოფილ პრეზიდენტს მიხეილ სააკაშვილს, შინაგან საქმეთა ყოფილ მინისტრს, ივანე მერაბიშვილს, სპეციალური ოპერატიული დეპარტამენტის ყოფილ უფროსს, ერეკლე კოდუას და ამავე დეპარტამენტის სამმართველოს ყოფილ უფროსს, გია სირაძეს 2014 წელს წაუყენეს.

მიხეილ სააკაშვილს და ივანე მერაბიშვილს ბრალად ჯანმრთელობის განზრახ მძიმე დაზიანების ორგანიზება, ერეკლე კოდუას და გია სირაძეს კი სიცოცხლისათვის სახიფათო ჯანმრთელობის მძიმე დაზიანება და ყაჩაღობა ედებათ.

საქმე ორ ეპიზოდად გაიყო და ვალერი გელაშვილის ცემის ფაქტზე ექსპრეზიდენტ მიხეილ სააკაშვილის ბრალეულობის საკითხი სასამართლოში ცალკე განიხილება.