ავსტრალიელი მსახიობი ქეით ბლანშეტი გამოცემა Variety-თან ინტერვიუში განაცხადა, რომ სხვა მსახიობების მსგავსად პროდიუსერ ვაინშტაინის მხრიდან სექსუალური შევიწროების მსხვერპლი ისიც იყო.

„ვფიქრობ, რომ ის ნადირობდა, როგორც მტაცებლების უმეტესობა, ძირითადად დაუცველებზე. მის მიმართ ცუდი წინათგრძნობა მქონდა... ხშირად მეუბნებოდა: „ჩვენ მეგობრები არ ვართ“, - განუცხადა მსახიობმა გამოცემას.

ბლანშეტმა აღნიშნა, რომ არ გაუკეთებია ის, რასაც ვაინშტაინი სთხოვდა, თუმცა არ დაუზუსტებია, პროდიუსერის თხოვნის შინაარსი. „მისი ქმედება სამწუხაროდ დამახასიათებელია ზოგიერთი მამაკაცისთვის. სასურველია, რომ ამ ადამიანების მიმართ დაიწყოს სასამართლო გამოძიება. ჩვენ გვჭირდება პრეცედენტის შექმნა“, - აღნიშნა ბლანშეტმა.

მსახიობი მონაწილეობდა რამდენიმე ფილმში, რომელთა პროდიუსერიც ვაინშტაინი იყო, მათ შორის არის სურათები „კეროლი“ და „ავიატორი“.

ჰოლივუდში ბოლო დროის ერთ-ერთი ყველაზე ხმაურიანი სკანდალი აგორდა, როდესაც აშშ-ის ერთ-ერთი ყველაზე გავლენიანი კინოპროდიუსერი ჰარვი ვაინშტაინი ათობით ქალის სექსუალურ შევიწროებაში დაადანაშაულეს, მათ შორის იყვნენ ცნობილი მსახიობები ანჯელინა ჯოლი, უმა თურმანი და ეშლი ჯადი.

ვაინშტაინი თავისი კომპანიიდან დაითხოვეს, ნიუ-იორკის ხელისუფლებამ კი მის მიმართ გამოძიება დაიწყო.