ჰავაიზე ვულკან კილაუეას ამოფრქვევის გამო მოსახლეობის ევაკუაცია განხორციელდა. დიდ კუნძულზე გამოცხადდა საგანგებო მდგომარეობა. YouTube-ზე ვულკანის ამოფრქვევის უნიკალური კადრები გავრცელდა.

კუნძულის ტერიტორიაზე ორგანიზებულია სპეციალური თავშესაფრები. შტატის ხელისუფლებამ მოსახლეობის ევაკუაცია გამოაცხადა. გავარვარებული ლავა საცხოვრებელ სახლებს უახლოვდება და ლეილანი-ესტეიტსის დასახლებამდე მიაღწია. ადგილობრივი მედიის მონაცემებით, 10 ათასამდე ადამიანი გაყვანილია უსაფრთხო ტერიტორიაზე.

 სეისმოლოგების ცნობით, კუნძულზე 5,0 მაგნიტუდის მიწისძვრა მოხდა. ამ დღეებში რეგიონში სხვადასახვა სიმძლავრის რამდენიმე მიწისძვრა დაფიქსირდა. ადგილობრივი მოსახლეობა ვულკანის შესაძლო გაღვიძების შესახებ მეცნიერებმა ერთი კვირით ადრე გააფრთხილეს.

ვულკანი კილაუეა ერთ-ერთი ყველაზე აქტიური მოქმედი ვულკანია დედამიწაზე. ის მდებარეობს ჰავაის არქიპელაგის უმსხვილეს კუნძულზე, რომელიც დიდი კუნძულის სახელით არის ცნობილი.