ვისაც კვირიკაშვილთან სუფრაზე ჭიქა აუწევია, ყველა შავ სიაში შეიყვანეთ, - ასე მიმართა „ერთიანი ნაციონალური მოძრაობის“ წევრმა რომან გოცირიძემ საპარლამენტო უმრავლესობას.

მისი თქმით, ხელისუფლების მხრიდან იყო დაპირება, რომ მთავარი პროკურორის პოსტზე წარადგენდნენ პოლიტიკურად ნეიტრალურ კანდიდატურას. თუმცა, აღმოჩნდა, რომ გრძელდება მავნე პრაქტიკა.

„ალბათ, ახდება ჩემი პროგნოზი და ამ თანამდებობაზე კვლავ ვიხილავთ რომელიმე ყოფილს. ყოფილი რას ნიშნავს, ყველამ იცის - თანამდებობას ყოველთვის იკავებენ ადამიანები, რომლებიც არიან ბატონი ბიძინა ივანიშვილის ყოფილი ექიმი, ყოფილი მცველი, ყოფილი ბანკირები და ახლა ვიხილეთ ყოფილი ადვოკატი. როდემდე უნდა გაგრძელდეს ეს კომიკური და მეორე მხრივ, საშიში ტენდენცია?! სად არის პოლიტიკურად ნეიტრალური კანდიდატი იმ სიაში, რომელიც წარმოადგინეს? ათი ადამიანი არის სიაში და 9 არის ანტურაჟის შესაქმნელად, ბალასტი - სამწუხაროდ, სერიოზული ადამიანები მოჩვენებით ფონს ქმნიან, განა არ იციან, ვინ იქნება პროკურორი. საქართველოში სავალალო მდგომარეობაშია მაღალი თანამდებობის პირების შერჩევის საკითხი“, - განაცხადა გოცირიძემ.