ოპერატიულ-სამძებრო საქმიანობაზე ზედამხედველობის დეპარტამენტის უფროსი, მიხეილ შაყულაშვილი, აცხადებს, რომ ხორავას ქუჩაზე მოკლული ლევან დადუნაშვილი მისი შვილის მეგობარი იყო და ამის შესახებ მან მირზა სუბელიანს პირველივე სატელეფონო საუბრისას უთხრა, როდესაც სუბელიანი მას პირადი სურვილით ტელეფონით დაუკავშირდა და რჩევა ჰკითხა.

ამის შესახებ მან განცხადება „ხორავას ქუჩის“ საქმეზე შექმნილი კომისიის სხდომაზე განაცხადა. „16:15 საათზე შემოდის ზარი, ვკითხე, რომელი ხარ? თავიდან ვერ ვიცანი, ვერ მივხვდი რომ მირზა იყო... ვუპასუხე, არ მცალი მირზა, 51-ე სკოლის ამბავზე ვარ გადართული და მერე დავილაპარკოთ მეთქი. ჩემდა მოულოდნელად მეუბნება, ზუსტად ამ საკითხზე მინდოდა შეხვედრა... ვგრძნობდი, რომ რაღაც ინფორმაცი აქვს და ვუთხარი, მოდი სასწრაფოდ... დაახლოებით 16:35 წუთზე მოდის ჩემთან, ქალაქ თბილისის პროკურტურაში. შემოდის, გაფითრებულია, დაბნეულია. ვსვამ მაგიდასთან და ვეკითხები რა ხდება? მეუბნება, 51-სკოლასთან რომ მოხდა უბედურება, ეს ჩემი შვილის და მისი მეგობრის ჩაგვრის გამო მოხდა, მერე ჩემმა შვილმა გადაურეკა დეიდაშვილს, რომელმაც თავისი მეგობრები წამოიყვანა, გავიდნენ სადღაც სკვერზე, სადაც მოხდა ეს ჩხუბი და ეს უბედურება,“ - იხსენებს მიხეილ შაყულაშვილი.

ამასთან, ის ამბობს, რომ ამ შეხვედრისას მირზა სუბელიანმა უთხრა, რომ მისი შვილი თანამონაწილე არ ყოფილა და არ იცოდა ვინ იხმარა დანა.

ის აქცენტს აკეთებს იმაზე, რომ ეს კითხვა მას სამჯერ შეუტრიალა და სამივეჯერ იგივე პასუხი მიიღო.

„ვხვდები, რომ შემდგომში კითხვების დასმას აზრი აღარ აქვს, ვეუბნები ასეთ ტექსტს. მირზა, გარდაცვლილია ჩემი შვილის მეგობარი (ლევან დადუნაშვილი), ჩათვალე რომ ჩემი შვილია გარდაცვლილი... ახლავე ჯდები მანქანაში და შვილთან ერთად მიდიხარ პოლიციაში და აძლევ სრულ ჩვენებას. ამის შემდეგ მირზა სუბელიანი არაფერს ამბობს, ტრიალდება და ტოვებს შენობას,“ - აცხადებს შაყულაშვილი.

მისი თქმით, ამის შემდეგ მან საქმის კურსში ჩააყენა მაშინდელი მთავარი პროკურორი. „ამ მომენტისთვის პოლიციას არც ვერსიები ჰქონდა დალაგებული, არც პირები იცოდნენ ვინ მონაწილეობდა ამ ჩხუბში(შეიძლება ერთი-ორი სცოდნოდათ) და ამის გამო ვითვალისწინებდი, რომ უმნიშვნელოვანეს ინფორმაციას ფლობდა მირზა სუბელიანის შვილი, მირზას მონაყოლიდან გამომდინარე. ... დავურეკე ჩემს მოადგილე გაბოძეს და მოვუყევი მირზას ვიზიტის შესახებ და ვუთხარი გაეკონტროლებინა და სრულყოფილი ინფორმაცი ამოგვეღო ამ ბავშვისგან,“ - ამბობს მიხეილ შაყულაშვილი.

ცნობისთვის დღეს კომისი დადანუაშვილისა და სარალიძის მკველობის საქმეზე მთავარი პროკურატურის შინაგან საქმეთა სამინისტროს გენერალურ ინსპექციაში, ცენტრალური კრიმინალური პოლიციის დეპარტამენტსა და საპატრულო პოლიციის დეპარტამენტში გამოძიების საპროცესო ხელმძღვანელობის დეპარტამენტის უფროსის გიორგი გაბოძეს და მთავარი პროკურატურის სახელმწიფო უსაფრთხოების სამსახურში, სახელმწიფო დაცვის სპეციალურ სამსახურში, დაზვერვის სამსახურში და შინაგან საქმეთა სამინისტროს სახელმწიფო საქვეუწყებო დაწესებულება - სასაზღვრო პოლიციაში გამოძიების საპროცესო ხელმძღვანელობისა და ოპერატიულ-სამძებრო საქმიანობაზე ზედამხედველობის დეპარტამენტის უფროსის მიხეილ შაყულაშვილის ოფიციალური ახსნა-განმარტების ისმენს.