ღიმილის მომგვრელია ბრალდებები, თითქოს ხელისუფლებას რომელიმე ტელევიზიის მითვისება სურს, - ამის შესახებ საპარლამენტო უმრავლესობის ლიდერმა არჩილ თალაკვაძემ ტელეკომპანია „იბერიასთან“ დაკავშირებით გავრცელებულ ჩანაწერზე დასმული კითხვის პასუხად განაცხადა.

მისი თქმით, აღნიშნულ ჩანაწერზე მხოლოდ პოლიტიკური შეფასების გაკეთება შეუძლია, რადგან ბრალდებები კანონმდებლობის გადმოსახედიდან უნდა შეფასდეს.

„ღიმილის მომგვრელია ის ბრალდებები, რომ თითქოს ხელისუფლებას რომელიმე ტელევიზიის მითვისება სურს. ჩვენ არაერთხელ გვქონდა შესაძლებლობა და რესურსი, რომ ახალი მედია შეგვექმნა, გაგვევითარებინა ის, მაგრამ მიგვაჩნია, რომ ეთიკის საკითხია, რომ სახელისუფლებო გუნდს, ხელისუფლებას არ ჰქონდეს თავისი საკუთარი მედია. ჩვენ მედიის თავისუფლების ერთგული ვრჩებით, გვჭირდება კრიტიკული, თავისუფალი და დამოუკიდებელი მედია. კონკრეტული ბრალდებები უნდა შეფასდეს კანონმდებლობის გადმოსახედიდან, მე შემიძლია მხოლოდ პოლიტიკური შეფასება გავაკეთო“, - განაცხადა არჩილ თალაკვაძემ.

შეგახსენებთ, „რუსთავი 2"-მა აუდიოჩანაწერი გაავრცელა, სადაც მათი ინფორმაციით, ერთმანეთს სპორტის ყოფილი მინისტრი ლევან ყიფიანი და „ომეგა ჯგუფის” დამფუძნებელი ზაზა ოქუაშვილი ესაუბრებიან. 

ტელეკომპანიის ცნობით, ჩანაწერში ლევან ყიფიანი ამბობს, რომ "ომეგა ჯგუფის" პრობლემებს უჩა მამაცაშვილი აგვარებდა, სანაცვლოდ კი ორ მილიონს ითხოვდა.