შთაბეჭდილება მრჩება, რომ უმრავლესობის წევრები „ნაციონალური მოძრაობის“ მიმართ ტერმინ – დანაშაულებრივ რეჟიმს ერიდებიან, რადგან არ იციან, ამას დასავლელი პარტნიორების მხრიდან რა რეაქცია მოჰყვება, - ამის შესახებ პარლამენტის ვიცე-სპიკერმა ირმა ინაშვილმა განაცხადა.

მისი თქმით, ფაქტობრივად, იურიდიულმა კომიტეტმა რეზოლუციის პროექტის სულისკვეთება გაიზიარა და ყველა იმ პოზიციას მხარი დაუჭირა, რაც მათი მხრიდან გაჟღერდა.

„შევთანხმდით იმაზე, რომ 2004-2012 წლებში ის სისტემა, რაც სააკაშვილმა-ბოკერიამ დაამკვიდრეს, დანაშაულებრივი და ძალადობრივი სისტემა იყო. კომიტეტს კენჭისყრას ვთავაზობთ, რომ პოზიცია ჩამოაყალიბოს. შთაბეჭდილება მრჩება, რომ ტერმინ – დანაშაულებრივ რეჟიმს ერიდებიან, რადგან არ იციან, ამას დასავლელი პარტნიორების მხრიდან რა რეაქცია მოჰყვება. ეს დანაშაულებრივი რეჟიმი იყო და რეზოლუციაში შემთხვევით არაფერია ნათქვამი. ქუჩაში ადამიანების კვლა, მშვიდობიანი მანიფესტანტების დარბევა, ქონების წართმევა, მედიისა და ბიზნესის დატერორება ხდებოდა. ეს ყველაფერი სისტემური დანაშაული იყო და ამას არც იურიდიული კომიტეტი არ უარყოფს, მაგრამ ტერმინზეა პრობლემა. დღის წესრიგიდან ტერმინს არ ვხსნი და იმედია, პლენარულ სხდომაზე ასე გავა”, – განაცხადა ინაშვილმა.