უკვე შემოსულია 500-მდე განაცხადი, საიდანაც 381 გამოქვეყნებულია. თითოეულ დარღვევაზე ფოტო, აუდიომასალა, დარღვევის შინაარსია ასახულია, - ამის შესახებ საპრეზიდენტო კანდიდატის, გრიგოლ ვაშაძის შტაბის ხელმძღვანელმა გიორგი ვაშაძემ განაცხადა.

მისი თქმით, საგანგაშოა, რომ ქობულეთის 32-ე უბანზე ორი ხუთი ნომერია ბიულეტენზე, დაფიქსირებულია ავტომანქანებიდან ამომრჩევლის მოსყიდვა, საარჩევნო უბნებზე მასიურად გამოკრულია „ქართული ოცნების“ პლაკატები, რაც არის დარღვევა.

მისივე თქმით, მარნეულში 58-ე უბანზე დეპუტატი ქარიმოვი ფიზიკურად გაუსწორდა გაერთიანებული ოპოზიციის წარმომადგენელს.

მისივე თქმით, გვიან გაიხსნა ახალქალაქში რამდენიმე უბანი. 

„ფოთის მეორე უბანზე წილისყრის გარეშე გადანაწილდა ფუნქციები, ახალქალაქის რამდენიმე უბანზე დილით ელექტროენერგია არ იყო”, – განაცხადა გიორგი ვაშაძემ.

შეგახსენებთ, დღეს, 28 ოქტომბერს, საქართველოს მოქალაქეები ექვსწლიანი ვადით მეხუთე პრეზიდენტს ირჩევენ. 2018 წლის არჩევნებზე პრეზიდენტად კენჭისყრის სურვილი სულ 46-მა კანდიდატმა გამოთქვა. თუმცა ცესკო-მ მხოლოდ 25 კანდიდატი დაარეგისტრირა, საიდანაც 19 მათგანი წარდგენილია პოლიტიკური პარტიის მიერ, ხოლო 6 საინიციატივო ჯგუფმა წარადგინა. საპრეზიდენტო არჩევნებისთვის ამომრჩეველთა საერთო რაოდენობაა 3 518 877. არჩევნებისთვის რეგისტრირებულია და დააკვირდება საარჩევნო სუბიექტების 82 000-ზე მეტი წარმომადგენელი, 73 ადგილობრივი სადამკვირვებლო ორგანიზაციის 22 000-ზე მეტი დამკვირვებელი და 58 საერთაშორისო ორგანიზაციის 1100-ზე მეტი საერთაშორისო დამკვირვებელი. საპრეზიდენტო არჩევნებს 125 მედია ორგანიზაციის 2000-ზე მეტი ჟურნალისტი აშუქებს. აკრედიტებულ მედიასაშუალებებს შორის 31 საერთაშორისო და 94 ადგილობრივი მედია ორგანიზაციაა. იმ შემთხვევაში, თუ პირველ ტურში საპრეზიდენტო კანდიდატებიდან რომელიმე ამომრჩეველთა ხმების 50 %-ზე მეტს ვერ მოაგროვებს, არჩევნების მეორე ტური გაიმართება, რომელიც უნდა ჩატარდეს არაუგვიანეს 1-ლი დეკემბრისა.