„ვინ არის გიორგი აბდალაძე?“ – მიმართა ჟურნალისტებს პრეზიდენტობის კანდიდატმა. მას შემდეგ, რაც ჟურნალისტმა აბდალაძის ვინაობა შეახსენა, ვაშაძემ აღნიშნა: „წარმოდგენა არ მაქვს. ჯერ ერთი ეს ადამიანი არასოდეს მუშაობდა საგარეო საქმეთა სამინისტროში და იყო შრომითი ხელშეკრულებით ჩვენთან. ჯერ ერთი, მან უნდა მიმართოს პროკურატურას, თუ რამე კითხვები აქვს“,  – აღნიშნა ვაშაძემ ჟურნალისტებთან.

რაც შეეხება გრიგოლ ვაშაძის 2011 წლის განცხადებას,  რომ ფოტოგრაფების საქმეში არსებობდა მყარი მტკიცებულებები მათ დანაშაულზე, „ნაციონალური მოძრაობის“ პრეზიდენტობის კანდიდატი ამას დეზინფორმაციას უწოდებს.

„არასოდეს ეს არ მითქვამს. ნუ ამახინჯებთ ჩემს ციტატებს. არასოდეს მითქვამს, არასოდეს ასეთი რამ არ მითქვამს. მე ვიძახდი, რომ სამართალდამცავები და პროკურატურა ამბობს, რომ არსებობს მყარი მტკიცებულებები და ისინი გაერკვევიან ამ საქმეში“, – განაცხადა გრიგოლ ვაშაძემ.

ფოტორეპორტიორმა, გიორგი აბდალაძემ „ტელეიმედის“ ეთერში რამდენიმე დღის წინ ფოტორეპორტიორების დაკავების საქმე გაიხსენა. „გრიგოლ ვაშაძემ უფრო კარგად იცის და მითხრას, რატომ გამიშვა ციხეში, რატომ აწამებინა ჩემი თავი? ხომ დამიჭირე, რატომ გამიშვი ერთ კვირაში, თუ ორ კვირაში“, - აღნიშნა აბდალაძემ.