ამერიკის შეერთებულ შტატებში დღეს კონგრესის შუალედური არჩევნები იმართება. აშშ-ის მოქალაქეები წარმომადგენელთა პალატის სრულ შემადგენლობას - 435 წევრსა და 100-ადგილიანი სენატის 35 წევრს აირჩევენ. ამავე დღეს 36 შტატში გუბერნატორების არჩევნები გაიმართება.

ამჟამად წარმომადგენელთა პალატაში 236 რესპუბლიკელი და 193 დემოკრატი კონგრესმენია, ექვსი ადგილი კი ვაკანტურია. სენატში კი რესპუბლიკელები 51 მანდატს ფლობენ, დემოკრატები 49-ს.

ამგვარად კონგრესის ორივე პალატას რესპუბლიკელები აკონტროლებენ. პოლიტოლოგების პროგნოზით, შუალედური არჩევნების შედეგად, წარმომადგენელთა პალატაში უმრავლესობას დემოკრატები მოიპოვებენ, რესპუბლიკელები კი სენატში სავარაუდოდ უმრავლესობის შენარჩუნებას შეძლებენ.

ზოგიერთ შტატში სხვადასხვა საკითხზე რეფერენდუმებია დაგეგმილი. კერძოდ, ხუთ შტატში ხმის მიცემის პროცედურა გაიმართება სამედიცინო ან სარეკრეაციო მარიხუანას მომხმარების შესახებ საკანონმდებლო ცვლილებებთან დაკავშირებით; ორ შტატში მოსახლეობამ საარსებო მინიმუმის გაზრდის საკითხი უნდა გადაწყვიტოს; სამ შტატში კი კენჭისყრაზე აბორტებთან დაკავშირებული საკითხები გადის.