ყოვლად დაუშვებელია, რაც ხდება დღეს შავი ზღვის აკვატორიაში, რადგან ეს კიდევ ერთი გამოხატულებაა  აგრესიისა, რომელსაც არანაირი გამართლება არ აქვს და, რომელიც ყველანაირად არღვევს საერთაშორისო სამართლის პრინციპებს, – ამის შესახებ ქერჩის სრუტეში განვითარებულ მოვლენებთან დაკავშირებით, საქართველოს საპარლამენტო უმრავლესობის წევრმა, დიმიტრი ცქიტიშვილმა განაცხადა.

მისი თქმით, საქართველოს პოზიცია ძალიან ცალსახაა.

„ძალიან ცალსახაა ამასთან დაკავშირებით ჩვენი პოზიცია და ასეც იქნება. ამ შემთხვევაში, საუბარი გვაქვს ერთი მხრივ, სუვერენიტეტისა და ტერიტორიული მთლიანობის ხელყოფაზე, მეორე მხრივ, ეს არის უსაფრთხოების საკითხები, შავი ზღვის რეგიონული უსაფრთხოება, კომპლექსური საკითხები და ვფიქრობ, საერთაშორისო თანამეგობრობასაც ძალიან კონკრეტული პასუხები და კონკრეტული პოზიცია ექნება ამასთან დაკავშირებით“, – აღნიშნა დიმიტრი ცქიტიშვილმა.

25 ნოემბერს, რუსეთის მხრიდან უკრაინული გემების მიმართ თავდასხმა განხორციელდა.რუსი სამხედროების თავდასხმის შედეგად დაიჭრა 6 უკრაინელი. ყირიმის ავტონომიურ რესპუბლიკაში უკრაინის პრეზიდენტის წარმომადგენელის, ბორის ბაბინის განაცხადებით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული.

გვიან ღამით, უკრაინაში ქვეყნის თავდაცვისა და უსაფრთხოების ეროვნული საბჭოს საგანგებო სხდომა გაიმართა, სადაც პრეზიდენტმა პოროშენკომ მხარი დაუჭირა სამხედრო კაბინეტის წინადადებას, უკრაინაში საომარი მდგომარეობის გამოცხადების შესახებ.