მომწიფდა ის ეტაპი, რომ მეც და რამდენიმე ადამიანმაც საბოლოო გადაწყვეტილება მივიღოთ, - განაცხადა უმრავლესობის წევრმა, ეკა ბესელიამ „ქართული ოცნების“ ოფისში გამართული შეხვედრის დასრულების შემდეგ.

„ალბათ დადგა ის ეტაპი, მომწიფდა ის ეტაპი მეც და რამდენიმე ადამიანმაც, საბოლოო გადაწყვეტილება უნდა მივიღოთ, ღირებულებებთან და ფასეულობებთან დაკავშირებით - ჩვენ ერთ პოზიციაზე ვახერხებთ, რომ დავინახოთ ერთიანი სვლა თუ  - ვერა. ეს ეტაპი დავინახე მე უკვე დღეს, რომ ძალიან ახლოს მოვიდა. ამიტომ, მე გეტყვით ჩემს მოსაზრებას: სწორედ იქიდან გამომდინარე, რომ მე არ მინდა რაიმე ჩვენი ნაბიჯით ხელი შევუწყო სააკაშვილის ძალადობრივი სისტემის რეანიმირებას და მის მობრუნებას 2020 წელს. მე არ მინდა იმ ძალადობრივ სისტემას მივცე შანსი,  რომ მოტრიალდეს ისევ და ისევ ხელში აიღოს ძალაუფლება. ამიტომ, ჩვენ უნდა დავინახოთ ჩვენი შემდგომი ნაბიჯები, როგორი უნდა იყოს. მე პირადად ავიღებდი რამდენიმე დღეს იმისთვის რომ საბოლოო გადაწყვეტილება მივიღო. ჩვენ შევძლებთ ამ ფასეულობების ირგვლივ გაერთიანებას და ერთად გაგრძელებას, ქართულ ოცნებას ვგულისხმობ, იმ პარტიას, რომლის დამფუძნებელი ვარ, რომელიც 7 წელია ჩემ ხელში ფორმირდება, თუ ვერა. ჩემთვის ძალიან ემოციური პროცესია, მაგრამ არის გადაწყვეტილების ეტაპი. ამიტომ  რამდენიმე დღეს ავიღებთ ამისთვის“, - განაცხადა ბესელიამ.