ქურთმა მებრძოლებმა (სირიის დერმოკრატიული ძალები) განაცხადეს, რომ კონტროლი დაამყარეს ტერორისტების ბანაკზე, ბაღუზის დასახლებული პუნქტში, რომელიც   სირიაში „ისლამური სახელმწიფოს“ ბოლო დასაყრდენი იყო.

ქურთი მებრძოლების წარმომადგენელმა მუსტაფა ბალიმ სოციალურ ქსელში გაავრცელა ინფორმაცია, რომ ბაღუზში საბოლოო გამარჯვებაზე საუბარი ჯერ ადრეა, თუმცა საუბარია მნიშვნელოვან წარმატებაზე.

მისი თქმით, ტერორისტები განაგრძობენ კონტრშეტევებს, იმის მიუხედავად, რომ ბაღუზში თავიანთ პოზიციებს ეტაპობრივად თმობენ. უკანასკნელ საათებში ქურთთა პოზიციებს უტევდნენ თვითმკვლელი ტერორისტები, რომელთა უმეტესობა ქალები იყვნენ.

მანამდე „სირიის დემოკრატიული ძალების“ წარმომადგენლებმა განაცხადეს, რომ ტყვედ 157 ტერორისტი აიყვანეს, რომელთა უმეტესობა უცხოელია. ზუსტი ინფორმაცის, თუ რამდენი ტერორისტი და მშვიდობიანი მოქალაქეა დარჩენილი ბაღუზში, ქურთ მებრძოლებს არ გააჩნიათ.

ბაღუზი ერაყის საზღვართან მდებარეობს. ალყაში მოქცეული ტერორისტების ნაწილმა იარაღი დაყარა, „სირიის დემოკრატიული ძალების“ მებრძოლები „ისლამური სახელმწიფოს“ ბოლო დასაყრდენზე იერიშებს განაგრძობენ.