საქართველომ ძალიან სერიოზული დარტყმა მიიღო საპრეზიდენტო არჩევნებზე იმიჯის თვალსაზრისით და თუ ასე გაგრძელდა, ეს კიდევ უფრო გაღრმავდება, უფსკრული ხალხსა და ხელისუფლებას შორის ,– ამის შესახებ „ევროპული საქართველოს“ წევრმა, გიგი წერეთელმა „ნაციონალური მოძრაობის“ წევრების დაკავებასთან დაკავშირებით განაცხადა.

მისი თქმით, ზუგდიდში მომხდარი ფაქტი აბსოლუტურად მიუღებელია, პირველ რიგში, პოლიტიკური თვალსაზრისით,

„როგორც ჩანს, ადგილობრივ კანდიდატსა და ხელისუფლებას ძალიან ეშინია სანდრა რულოვსის კანდიდატურის. მეორე მხრივ, საქართველომ ძალიან სერიოზული დარტყმა მიიღო საპრეზიდენტო არჩევნებზე იმიჯის თვალსაზრისით და თუ ასე გაგრძელდა, ეს კიდევ უფრო გაღრმავდება, კიდევ უფრო გაღრმავდება უფსკრული ხალხსა და ხელისუფლებას შორის. ეს არის ძალიან სახიფათო მიდგომა ჩემი აზრით“, – განაცხადა გიგი წერეთელმა.

მისივე თქმით, საარჩევნო კამპანიის დროს ოპოზიციის მიმართ ძალიან ფრთხილი უნდა იყოს პოლიციაც და ხელისუფლებაც.

ზუგდიდში გუშინ „ნაციონალური მოძრაობის“ სამი წევრი – პარტიის პრესსამსახურის უფროსი გიორგი პატარაია, ზუგდიდის ორგანიზაციის თავმჯდომარე ანი წითლიძე, ასევე  პარტიის ერთ-ერთი წევრი მანუჩარ ჩხეტია წვრილმანი ხულიგნობისა და პოლიციელთა კანონიერი მოთხოვნისადმი დაუმორჩილებლობისთვის დააკავეს. მოგვიანებით, პოლიციამ პატარაია და წითლიძე გაათავისუფლა, ხოლო მანუჩარ ჩხეტია წინასწარი დაკავების იზოლატორში გადაიყვანეს.