ტროპიკული შტორმი „ბარი“, რომელიც ამ დროისთვის მექსიკის ყურეში გადაადგილდება, სავარაუდოდ ქარიშხლად გადაიქცევა. „ბი ბი სი“-ს ცნობით, სინოპტიკოსების პროგნოზით, ის ახალ ორლეანს დაარტყამს, რომელიც ძლიერი წვიმების შედეგად დატბორილია.

დაბლობში მდებარე რაიონების მცხოვრებლებს ხელისუფლებამ ევაკუაცია ურჩია. მოქმედებს საგანგებო რეჟიმი.

ქალაქის ხელისუფლება შიშობს, რომ მდინარე მისისიპი, შესაძლოა, ნაპირებიდან გადმოვიდეს და ქალაქი დატბოროს. მოსალოდნელია, რომ წყლის დონემ 6 მეტრით მოიმატოს.

10 ივლისს ახალ ორლეანში დაიტბორა მეტრო, ქალაქში სამი საათის განმავლობაში 20 სმ-ზე მეტი ნალექი მოვიდა.

სინოპტიკოსების პროგნოზით,  12 ივლისს ქარის სიჩქარე საათში 119 კმ-ს მიაღწევს, როდესაც ეს მოხდება შტორმი  ქარიშხლად ოფიციალურად გამოცხადდება. ის ლუიზიანას შტატში 25-35 სმ ნალექს გამოიწვევს და შეეხება ტეხასის შტატის ნაწილსაც.

დღემდე შტატის ისტორიაში ყველაზე დამანგრეველ ქარიშხალად „კატრინა“ მიიჩნევა. 2005 წელს მან ფაქტობრივად დაანგრია ქალაქი ახალი ორლეანი და 1 800 ადამიანის სიცოცხლე იმსხვერპლა.