როდესაც ძალა ჰქონდათ, არბევდნენ, კლავდნენ, აწამებდნენ, როდესაც ძალა მოაკლდათ, გადავიდნენ სტვენაზე, – ამის შესახებ განაცხადა საპარლამენტო უმრავლესობის ლიდერმა გია ვოლსკიმ იმ საპროტესტო აქციაზე, რომელიც პარლამენტთან იმართება. მისი თქმით, ოპოზიციას „გავრილოვის რევოლუციის“ მოწყობა უნდოდა და ვერ მოაწყო.

„სარკასტულად შეიძლება ვუპასუხო, რომ „გავრილოვის რევოლუციის“ მოწყობა უნდოდათ და ვერ მოაწყვეს. სამწუხაროდ, ადამიანების დაშავების ფაქტები იყო, მაგრამ ტოლობის ნიშნის დასმა იმ დანაშაულებებს შორის, რაც ჩაიდინეს, თუნდაც მიტინგის დაშლის დროს და იმ მოვლენებს შორის, რაც 20 ივნისს მოხდა, შეუძლებელია, გამორიცხულია, მაგრამ მცდელობები იქნება და ერთ-ერთი გამოხატულება იყო დღევანდელი სტვენა. როდესაც ძალა ჰქონდათ, არბევდნენ, კლავდნენ, აწამებდნენ, როდესაც ძალა მოაკლდათ, გადავიდნენ სტვენაზე. ასე რომ, ეს პასუხი ზუსტად შეესაბამება, ადეკვატურია იმ კომენტარებისა, რაც ჩვენმა ოპონენტებმა გააკეთეს“, – განაცხადა გია ვოლსკიმ.

საქართველოს პარლამენტის შენობასთან მოძრაობა „სირცხვილიას“ წევრები და „ერთიანი ნაციონალური მოძრაობის“ წარმომადგენლები აქციას მართავენ.  აქციის მონაწილეები პრემიერ მინისტრის კანდიდატად გიორგი გახარიას დასახელებას აპროტესტებენ. ადგილზე მობილიზებულია პოლიცია.