დეპუტატები აკაკი ზოიძე და რომან კაკულია არ ადასტურებენ ინფორმაციას, უმრავლესობის დატოვების შესახებ. თუმცა ზოიძე ამბობს, რომ გუშინ განვითარებულ მოვლენების გამო შეკითხვები აქვს და თანაგუნდელებთან მოლაპარაკებებს აწარმოებს. 

"არ ვადასტურებ. მნიშვნელოვანია, რომ უმრავლესობა შენარჩუნებული იყოს, თუმცა მე გარკვეული კითხვები მრჩება და შიდა კონსულტაციებს ჩემს პარტიულ უმრავლესობის კოლეგებთან ვაწარმოებ“ - აცხადებს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარაკაკი ზოიძე.  

რომან კაკულიას თქმით, კი ხელისუფლებიდან წასვლა უნდა უკავშირდებოდეს რწმენას, რომ უკეთესი მოცემულობის დატოვება იქნება შესაძლებელი.

"შემეძლო ასეთი ემოციური გადაწყვეტილება მეც მიმეღო გუშინ, ამიტომ აღარ გავაკეთე არანაირი კომენტარი, მაგრამ მე ვიცი ერთი რამ, რომ ხელისუფლებიდან წასვლა უნდა უკავშირდებოდეს იმის რწმენას, რომ ამის შემდეგ შენ უკეთესი მოცემულობის დატოვება შეგიძლია ქვეყნად. მე არავის შეურაცხყოფას არ ვაყენებ, იმ ადამიანებს, რომლებიც გარეთ დგანან დღეს ქუჩაში, მიუხედავად იმისა, როგორი ტერმინებით მოგვიხსენიებენ ისინი ჩვენ, მაგრამ მე პირადად დამიტოვეთ უფლება, მქონდეს ეჭვი იმის, რომ მაგათი გაერთიანებიდან რომ რაიმე უკეთესი მოცემულობის შექმნა შეიძლება დღეს, მე ამას ვერ ვხედავ,“ - აცხადებს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია.