12 დეკემბრის საპარლამენტო არჩევნების შედეგად, დიდი ბრიტანეთის პარლამენტში რეკორდულად ბევრი ქალი მოხვდა.

ამ მომენტისთვის ბრიტანული მედიის მიერ გამოქვეყნებული არსებული მონაცემებით, თემთა პალატაში 220 ქალი მოხვდა. მანამდე რეკორდული მაჩვენებელი 2017 წლის არჩევნების შედეგად დაფიქსირდა. მაშინ პარლამენტში 208 ქალი შევიდა.

წელს არჩევნებში კენჭს ქალი-კანდიდატების რეკორდულად დიდი რაოდენობა იყრიდა. სულ პარლამენტის ქვედა პალატაში ადგილებისთვის 1 100 ქალი იბრძოდა.

12 დეკემბერს, დიდ ბრიტანეთში პარლამენტის არჩევნები გაიმართა, სადაც დამაჯერებელი გამარჯვება მოიპოვა პრემიერ ჯონსონის კონსერვატიულმა პარტიამ.

ბოლო მონაცემებით, კონსერვატორები 650-ადგილიან ქვედა პალატაში 364 ადგილს მიიღებენ, ლეიბორისტები - 203-ს, შოტლანდიის ეროვნული პარტია - 48 ადგილს, ლიბერალ-დემოკრატები - 11-ს.