რუსეთის პრეზიდენტის პრეს-სპიკერმა დიმიტრი პესკოვმა განაცხადა, რომ მოლაპრაკებების ნორმანდიული ფორმატი უნიკალურია და ის უკრაინისთვის შეიქმნა, საქართველოსთან პროლემების სტრუქტურა კი სხვაგვარია.

 „ნორმანდიული ფორმატი უნიკალურია და ის შეიქმნა უკრაინის სამხრეთ-აღმოსავლეთით არსებული კონფლიქტის, შიდაუკრაინული კონფლიქტის  დარეგულირების აუცილებლობიდან გამომდინარე. აქ საუბარია რუსეთსა და საქართველოს შორის ორმხრივ ურთიერთობაზე... პრობლემების სტრუქტურა სხვაგვარია, ამიტომ თითოეულ სტრუქტურას თავისი ფორმატი უნდა ჰქონდეს.

საქართველოს პირველი არხის გადაცემა „თავისუფალი ხედვისთვის“ მიცემულ  ინტერვიუში საქართველოს პრეზიდენტმა, სალომე ზურაბიშვილმა განაცხადა, რომ დასავლელ პარტნიორებს უნდა ვეუბნებოდეთ, რომ გვჭირდება ნორმანდიული ფორმატის მსგავსი ფორმატები.

„ერთის მხრივ ალბათ უკრაინის საკითხსაც აქვს რაღაც ტესტის ფორმა. ამ ფორმატმა თუ გაამართლა, შეიძლება გახდეს საჭირო მისი განვრცობა. სხვათა შორის, ამ საკითხთან მიმართებით, აქაც საინტერესო არის საფრანგეთის პრეზიდენტის განცხადება, სადაც ის ლაპარაკობს უკრაინაზე, მაგრამ ასევე სხვა კონფლიქტებზე ევროპაში“, – განაცხადა სალომე ზურაბიშვილმა.