ჩინეთის ქალაქ ტიანცზინის სასამართლომ ინტერპოლის ყოფილ პრეზიდენტს მენ ჰუნვეის 13 წლითა და 5 თვით პატიმრობა მიუსაჯა. მენ ჰუნვეი კორუფციის ბრალდებით იყო დაკავებული.

ჩინური მედიის ინფორმაციით, ბრალდებული ვერდიქტის გასაჩივრებას არ აპირებს.

ინტერპოლის ექს-პრეზიდენტმა და ჩინეთის უსაფრთხოების მინისტრის ყოფილმა მოადგილემ მენ ჰუნვეიმ, სასამართლო პროცესის დროს, 2019 წლის 20 ივნისს, ბრალი აღიარა. გამოძიება მას 3 მლნ დოლარის ოდენობის ქრთამის აღებას ედავებოდა.

მენ ჰუნვეი 2018 წლის 29 სექტემბერს საფრანგეთიდან ჩინეთში გაემგზავრა, რის შემდეგაც გაუჩინარდა. მოგვიანებით გაირკვა, რომ ის ჩინეთის პოლიციამ დააკავა.

მენ ჰუნვეი ინტერპოლს 2016 წლიდან ხელმძღვანელობდა.