ტერორისტული ორგანიზაცია „ისლამური სახელმწიფოს“ ახალი ლიდერი მისი ერთ-ერთი დამფუძნებელი და იდეოლოგი ამირ მუჰამედ საიდ აბდელ რაჰმან ალ-მაულია გახდა. ამის შესახებ გაზეთი The Guardian-ი წყაროზე დაყრდნობით იუწყება.

ახალი ლიდერის ვინაობა აბუ ბაქრ ალ-ბაღდადის ლიკვიდაციიდან რამდენიმე საათში დასახელდა. ტერორისტებმა ახალი ლიდერის სახელი აბუ იბრაჰიმ ალ-ჰაშიმი ალ-ქურეიში გააჟღერეს, თუმცა გამოცემის ინფორმაციით, ეს ამირ მუჰამედ საიდის სამხედრო ფსევდონიმია.

სახელმწიფო დეპარტამენტის ცნობით, ამირ მუჰამედ საიდი ეროვნებით თურქმენია და წარმოშობით ერაყიდან არის. ის ალ-ბაღდადის ერთ-ერთი მოადგილე იყო.

მუჰამედ საიდი ალ-ბაღდადის 2004 წლიდან იცნობდა, როდესაც ორივე ერაყში ამერიკულ ციხეში სასჯელს იხდიდა.

The Guardian-ის მონაცემებით, ამირ აბდელ რაჰმანი ცდილობს გააერთიანოს დაჯგუფების ხელმძღვანელები, რომლებიც ორგანიზაციას ძირითადად გვიან შეურთდნენ. ამის გარდა, მას კავშირები აქვს თურქეთში, სადაც მისი ძმა პოლიტიკურ მოძრაობა „ერაყელი თურქმენების ფრონტს“ წარმოადგენს.

ექსპერტების მონაცემებით „ისლამური სახელმწიფოს“ ლიდერი შესაძლოა ერაყის ქალაქ მოსულის შემოგარენში იმალებოდეს.