"ქართულმა ოცნებამ" შეერთებული შტატებში მოქმედ ლობისტურ კომპანია DCI Group AZ-თან გააფორმა ხელშეკრულება. შესაბამისი ინფორმაცია აშშ-ის იუსტიციის დეპარტამენტის ვებგვერდზე გამოქვეყნდა.

გაფორმებულ ხელშეკრულებას პარტიის სახელით ხელს აღმასრულებელი მდივანი ირაკლი კობახიძე აწერს. ხელშეკრულება 12 თებერვალს არის გაფორმებული.

მომსახურების ხელშეკრულების მოქმედების ვადა განსაზღვრულია 2020 წლის 31 ოქტომბრამდე. ღირებულება კი თვეში 33,333 დოლარს შეადგენს, შესაბამისად, ქართულ ოცნებას ლობისტური კომპანიის მომსახურება სულ 299,997 დოლარი დაუჯდება.

მანამდე გავრცელდა ინფორმაციათ, რომ "ქართულმა ოცნებამ" გავლენიან ლობისტურ კომპანია Hogan Lovells-თან გააფორმა ხელშეკრულება.

როგორც მხარეებს შორის გაფორმებული ხელშეკრულება ცხადჰყოფს, ლობისტური კომპანია "ქართულ ოცნებას" შეერთებულ შტატებთან სტრატეგიული პარტნიორობის განმტკიცებაში დაეხმარება.

ლობისტური კომპანია საქართველოს მმართველ პარტიას შეერთებული შტატების საკანონმდებლო და აღმასრულებელი ხელისუფლების მაღალი თანამდებობის პირებთან ადვოკატირებას გაუწევს და პარტნიორობის სტრატეგიის შემუშავებაში დაეხმარება.

მომსახურების ხელშეკრულების მოქმედების ვადა განსაზღვრულია 2021 წლის იანვრამდე. ღირებულება კი თვეში 75 ათას დოლარს შეადგენს, შესაბამისად, ქართულ ოცნებას ლობისტური კომპანიის მომსახურება სულ 900 ათასი დოლარი დაუჯდება.