ჩრდილოატლანტიკური ალიანსი თურქეთის მხარდაჭერას განაგრძობს, მათ შორის ანტისაჰაერო თავდაცვის სფეროში, - ამის შესახებ ნატო-ს გენერალურმა მდივანმა იენს სტოლტენბერგმა განაცხადა.

 „ნატო აგრძელებს თურქეთის მხარდაჭერას, მათ შორის ანტისაჰაერო თავდაცვის სფეროში“, - აღნიშნა სტოლტენბერგმა ჩრდილოატლანტიკური საბჭოს საგანგებო სხდომის შედეგების მიხედვით, რომელიც თურქეთის თხოვნით მოიწვიეს.

მისი განცხადებით, ნატო გმობს სირიაში ესკალაციას, თანაგრძნობას უცხადებს დაღუპულების ოჯახებს და სოლიდარულია თურქეთის მიმართ.

 „დღეს თურქეთმა ისაუბრა უსაფრთხოების სფეროში არსებული სიტუაციის შესახებ, მოკავშირეები ნატო-ში გამოთქვამენ ღრმა მწუხარებას თურქი სამხედროების დაღუპვის გამო. ისინი ასევე გმობენ იდლიბის პროვინციაში რუსეთის მხარდაჭერით სირიის რეჟიმის იერიშს“, - განაცხადა სტოლტენბერგმა.

მისივე თქმით, მოკავშირეები მიიჩნევენ, რომ აუცილებელია სასწრაფოდ შეწყდეს ესკალაცია. „მოვუწოდებთ იერიშის შეწყვეტის, საერთაშორისო სამართლის დაცვისა და მშვიდობიანი გადაწყვეტის საქმეში გაეროს ძალისხმევის მხარდაჭერისკენ“, - განაცხადა სტოლტენბერგმა.

სირიის ჩრდილო-დასავლეთ ნაწილში თურქეთის სამხედროებზე ბაშარ ასადის შეიარაღებული ძალების მიერ მიტანილი იერიშის შედეგად 33 თურქი ჯარისკაცი დაიღუპა. მოგვიანებით, თურქეთმა სირიის არმიის შენაერთებზე საპასუხო იერიში მიიტანეს.

სირიის არმია, რომელსაც რუსეთი უჭერს მხარს, უკვე რამდენიმე კვირაა ცდილობს, გაათავისუფლოს იდლიბი სირიის ოპოზიციის შეიარაღებული მებრძოლებისგან, რომელთაც თურქეთი უჭერს მხარს.