იტალიაში, ბერგამოს პროვინციის ქალაქ კანონიკა-დადას (Canonica d'Adda­)  მერმა კორონავირუსის გავრცელების ფონზე, მაღაზიებში „მამაკაცებისა“ და „ქალების“ დღეები დააწესა.

მერის განკარგულების თანახმად, მამაკაცებს მაღაზიებში წასვლა კვირაში ოთხჯერ - ორშაბათს, ოთხშაბათს, პარასკევსა და კვირას შეეძლებათ, ხოლო ქალებს  დანარჩენ დღეებში - კვირაში სამჯერ.

ქალაქის მერის მიერ გამოქვეყნებულ დოკუმენტში ნათქვამია, რომ კორონავირუსის წინააღმდეგ ეფექტიანი ბრძოლა სხვა ღონისძიებებთან ერთად,  შესაძლებელია მხოლოდ იმ ადამიანების რაოდენობის შემცირებით, რომლებიც სახლებიდან ერთდროულად გამოდიან, რის გამოც სასურსათო მაღაზიებში ერთად დიდი რაოდენობით ხალხი გროვდება.

ბოლო მონაცემებით, იტალიაში კორონავირუსით ინფიცირებულთა რაოდენობა 132 547-ს შეადგენს გარდაცვლილია 16 523 ადამიანი, გამოჯანმრთელდა 22 837 პაციენტი.