„ნაციონალური მოძრაობის“ წევრი რომან გოცირიძე აცხადებს, რომ კონსტიტუციის შეცვლა და საარჩევნო სისტემის ნაწილობრივ გაუმჯობესება ოპოზიციის ერთიანობის შედეგია.

„ოპოზიციაში, რომელიც არის ძალიან განსხვავებული, მაგრამ რომელმაც მიაღწია ისტორიულ გამარჯვებას, შეძლო ერთ მაგიდასთან დაჯდომა, კონსტიტუციის შეცვლა და ნაწილობრივ გაუმჯობესება საარჩევნო სისტემის, ეს არის ერთიანობის შედეგი და ოპოზიციაში ისეთი საკითხები უნდა იყოს განხილული, რომლებიც ერთმანეთს აახლოებს და გვერდი ავუაროთ ისეთ საკითხებს, რომლებიც ოპოზიციაში წარმოშობს წინააღმდეგობას“, - აღნიშნა გოცირიძემ.

მისი თქმით, იმ დროს, როცა ხალხს შია და ქვეყანაში სხვა მნშვნელოვანი პრობლემებია მოსაგვარებელი, პრემიერობაზე საუბარი ნაადრევია.

„რა დროს პრემიერობაზეა საუბარი, რომელი პრემიერ-მინისტრები, ხალხს შია და ათასი სხვა პირველი ამოცანის საკითხებია გადასაჭრელი ქვეყანაში, მათ შორის პარტიების მიერ“,- განაცხადა გოცირიძემ და დასძინა, რომ „ნაციონალურ მოძრაობაში“ პრემიერ-მინისტრობის ან მინისტრობის ე.წ. ფარული კაბინეტის შესახებ მსჯელობა არასდროს არ ყოფილა.

შეგახსენებთ, 19 მაისს თაკო ჩარკვიანმა განაცხადა, რომ „ახალი საქართველოს“ ლიდერის, გიორგი ვაშაძის კანდიდატურა სამომავლოდ მსხვილ საფეხურზე უნდა გამოჩნდეს და პრემიერის ადგილი სწორედ ახალგაზრდა და სუფთა წარსულის მქონე ადამიანისთვისაა.

ჩარკვიანის განცხადების შემდეგ, „ახალი საქართველოს“ ლიდერმა, გიორგი ვაშაძემ აღნიშნა, რომ პრემიერობის კანდიდატად მის დასახელებაზე ოპოზიციაში საუბარი ნამდვილად იყო, თუმცა გადაწყვეტილება ჯერ მიღებული არ არის.

გუშინ კი „ნაციონალური მოძრაობის“ წევრმა ზაალ უდუმაშვილმა განაცხადა, რომ გიორგი ვაშაძის კანდიდატურა პრემიერის პოსტზე პარტიაში არ განიხილება, არც განიხილებოდა და არც მომავალში განიხილავენ.