აზერბაიჯანის პრეზიდენტმა ილჰამ ალიევმა საგარეო საქმეთა მინისტრი ელმარ მამედიაროვი თანამდებობიდან გაათავისუფლა.

საგარეო უწყებას ჯეიჰუნ ბაირამოვი უხელმძვანელებს, რომელიც მანამდე განათლების მინისტრის პოსტს იკავებდა.

ილჰამ ალიევმა მთავრობის სხდომის დროს მამედიაროვის საქმიანობა მწვავედ გააკრიტიკა.

მან განაცხადა, რომ როდესაც აზერბაიჯანი-სომხეთის საზღვარზე ვითარება გამწვავდა, საგარეო უწყების ხელმძღვანელმა რეაგირება არ მოახდინა,  ალიევის თქმით, როდესაც მთავრობის წევრები შეუსვენებლად მუშაობდნენ, მამედიაროვის ადგილსამყოფელის შესახებ არაფერი იცოდნენ.

„რას აკეთებდა საგარეო საქმეთა მინისტრი? სად იყო? ჩვენ ვმუშაობდით 12 ივლისის მოვლენების შემდეგ. პრემიერ-მინისტრი სამსახურში იყო, მე დილამდე ვმუშაობდი. თავდაცვის მინისტრი, გენშტაბის ხელმძღვანელი, შინაგან საქმეთა მინისტრი, საგარეო დაზვერვის ხელმძღვანელი და უშიშროების საბჭოს მდივანი დილამდე მუშაობენ. მე ვერ შევძელი საგარეო საქმეთა მინისტრის მოძებნა“, – აღნიშნა აზერბაიჯანის პრეზიდენტმა.

12 ივლისს დაწყებული შეიარაღებული დაპირისპირება სომხეთ-აზერბაიჯანის საზღვარზე ამ დრომდე გრძელდება.

ბაქოს ინფორმაციით, დაიღუპა 11 აზერბაიჯანელი სამხედრო, მათ შორის გენერალი.

სომხური მხარის განცხადებით, დაღუპულია ორი და დაჭრილია ხუთი სამხედრო. აზერბაიჯანი და სომხეთი ვითარების გამწვავებაში ერთმანეთს ადანაშაულებენ.

მამედიაროვის საგარეო სამქეთა პოსტს 2004 წლიდან იკავებდა.