ნორვეგიელი ტერორისტი, მემარჯვენე რადიკალი ანდრეს ბრეივიკი, პირობით ვადამდე გათავისუფლებას ითხოვს. იუწყება გაზეთი VG მსჯავრდებულის ადვოკატებზე დაყრდნობით.  ბრეივიკმა ქალაქ ოსლოში, კუნძულ უტოიაზე 2011 წელს მოაწყო ორი ტერაქტი, რომელსაც 77 ადამიანი ემსხვერპლა.  

აღნიშნულია, რომ ბრეივიკი მისი უფლებების დარღვევისთვის სახელმწიფოს წინააღმდეგ საჩივრის შეტანას გეგმავს.

ადვოკატის განმარტებით, ბრეივიკმა  მისჯილი 21 წლიდან რვა ციხეში გაატარა და ახლა თეორიულად ასეთი თხოვნის დაყენება შეუძლია. ადვოკტის თქმით, ბრეივიკი ისევ სამარტოო საკანში იმყოფება, რაც მსჯავრდებულს მისი უფლებების დარღვევად მიაჩნია.  

ბრეივიკმა სახელმწიფოს 2015 წელსაც უჩივლა. საჩივარი ნაწილობრივ დააკმაყოფილეს საოლქო სასამრთლოში, თუმცა სააპელაციო სასამართლომ გადაწყვეტილება გააუქმა და აღნიშნა, რომ ბრეივიკის პატიმრობით ადამიანის უფლებები არ ირღვევა. უზენაესმა სასამართლომ და ადამიანის უფლებათა სასამართლომ მსჯავრდებულის საჩივარი არ განიხილეს.

ბრეივიკმა 2011 წლის 22 ივლისს ოსლოს ცენტრში რვა, ხოლო კუნძულ უტოიაზე, ახალგაზრდულ ბანაკში 69 ადამიანი მოკლა. სასამართლომ მას 21-წლიანი პატიმრობა მიუსაჯა. ბრეივიკმა ადამიანების ხოცვა-ჟლეტა აღიარა, თუმცა დამნაშავედ თავს დღემდე არ ცნობს. მისი თქმით, ეს ნორვეგიის და დასავლეთ ევროპის კულტურული მარქსიზმისა და მუსულმანებისგან გადასარჩენად ჩაიდინა.

კუნძულზე თავდასხმას ემსხვერპლა საქართველოს მოქალაქე თამთა ლიპარტელიანი, რომელიც იმ მომენტში ბანაკში იმყოფებოდა. საქართველოს კიდევ ერთი მოქალაქე ნათია ჩხეტიანი, რომელიც ასევე ბანაკში იყო, სიკვდილს გადაურჩა.